Qeveria shqiptare ka ndryshuar qëndrin në lidhje me kompaninë “Rapiscan” duke u tërhequr nga arbitrazhi ndërkombëtar për anullimin e konçesionit të firmosur nga qeveria e kaluar për skanimin në dogana.
Mësohet se qeveria ka arritur të ndryshojë me mirëkuptim koncesionin e kundërshtuar nga biznesi, duke bërë të mundur uljen e tarifave dhe kostove për sipërmarrjen dhe duke lënë në këtë mënyrë të pa ndryshuara tarifat.
Sipas marrëveshjes me konçesionarin që i është dërguar për miratim parlamentit, skema e re e pagesës do të jetë me tarifa të përshkallëzuara në dy blloqe. Më konkretisht, për deklaratat doganore me vlerë mbi 1 mijë euro, biznesi do të paguajë 22 euro për shërbimin e skanimit, ndërsa për deklaratat nën këtë vlerë, pagesa do të jetë 5 euro.
Kjo do t’i mundësojë ekonomisë dhe bizneseve të kursejnë më shumë se 100 milionë euro për 15 vitet e ardhshme.
Sipas relacionit të marrëveshjes, me skemën e parë, kompania koncesionare “Rapiscan” do të përfitonte 316 milionë euro për 15 vitet e koncesionit. Por, me rishikimin e marrëveshjes, kjo shumë kufizohet në 210 milionë euro, ose 106 milionë euro më pak.
