Greqia vazhdon luftën me zjarret, prej gati një jave, duke iu afruar gjithnjë e më shumë kryeqytetit Athinë. Sipas ministrisë greke për krizat klimatike dhe mbrojtjen civile, në të gjithë vendin janë ende aktive 355 zjarre.
Autoritetet kanë bërë po ashtu të ditur, se për zjarrvënie të qëllimshme janë arrestuar 79 persona ndërsa orët e fundit janë parandaluar vatrat e reja në malin Parnitha, në veriperëndim të Athinës.
Vetëm këtë javë, nga zjarret, kanë humbur jetën 20 vetë. “Po kryeni krime kundër vendit tuaj. Zjarret që ju ndizni, janë kërcënimi më I madh për pyjet, pronat dhe mbi të gjitha, jetën njerëzore” tha ministri Vasilis Kikilias për mediat.
Vatra më e madhe aktive e zjarrit mbetet ajo pranë qytetit port të Aleksandropulis, më e madhe e regjistruar ndonjëherë në një vend të Bashkimit Europian. Ndërsa zjarri pranë Athinës po shndërrohet orë pas ore në një kërcënim të madh për një park kombëtar pranë saj.
/a.r
