Ilirjan Celibashi ka marrë detyrën e kryetarit të ri të KQZ-së, institucion i cili tani mban emrin Komisioni Shtetëror i Zgjedhjeve.
Ish kryetari i KQZ-së, Klement Zguri i dorëzoi detyrën Komisionerit Shtetëror të votuar dhe në Parlament me 106 vota pro.
Sipas Celibashit, sfida kryesore ngelet çështja e teknologjisë së informacionit. Kreu i KQZ, veçoi zgjedhjet e vitit 2005 dhe 2013, si të pranuara dhe me rrotacion kushtetues por tha se pavarësisht se faktori ndërkombëtar në përgjithësi, ka pasur vërejtje për zgjedhjet në Shqipëri, “kjo nuk është e gjitha një situatë kaq gri apo e zezë në rastin më të keq, ka pasur procese që dhe nga ndërkombëtarët kanë marrë vlerësim maksimal”.
“Do bëjmë të gjitha përpjekjet të kemi një qasje sa më të mirë në kuptimin e mundësive për ta realizuar këtë proces por koha ka bërë që edhe aspekte të tjera të procesit zgjedhor të jenë kaq të rëndësishme dhe me prioritet”.
Celibashi theksoi se tani institucioni i KQZ “ka një përbërje profesionistë që do krijojnë besim te qytetarët shqiptarë dhe te integriteti i votës së tyre”.
I pyetur nëse do kemi një proces numërimi më të shpejtë në zgjedhjet e 25 prillit, Celibashi tha:
“Është një çështje që meriton një adresim të shpejtë e me shumë kujdes nga ana jonë se përdorimi i teknologjisë së informacionit si një lloj ririe kanë impaktin e vet në lidhje me kohën e nxjerrjes së rezultatit. Do bëjmë gjithcka është e mundur që ky proces të jetë ligjor por dhe koha ka rëndësinë e vet”.
Riformatimi i KQZ do garantojë zgjedhje të mirëpranuara?
Celibashi: Edhe në të shkuarën ka pasur zgjedhje që jo vetëm janë pranuar nga palët, kemi dy rotacione kushtetuese të pranuara, ato të vitit 2005 dhe 2013, dhe faktori ndërkombëtar në përgjithësi, ka pasur vërejtje për zgjedhjet në Shqipëri, por kjo nuk është e gjitha një situatë kaq gri apo e zezë në rastin më të keq, ka pasur procese që dhe nga ndërkombëtarët kanë marrë vlerësim maksimal.
Në ceremoninë e dorëzimit të detyrës ishte edhe nënkryetarja e Komisionit Shtetëror të Zgjedhjeve, Lealba Pelinku, e cila tha se “duhet që falë bashkëpunimit dhe vullnetit mes palëve do të bëjmë edhe një plan veprimi për të arritur në realizimin e kësaj sfide”
***
Ilirjan Celibashi ka drejtuar edhe më parë institucionin e administrimit të zgjedhjeve, pasi ka qenë kryetar i KQZ-së për periudhën 2001 – 2006.
Celibashi është një ndër njohësit më të mirë të legjislacionit zgjedhor, ai ka shërbyer si ministër i qeverisë Rama.
Ndërkohë që prej vitesh, Ilirjan Celibashi ka ushtruar aktivitetin me studion e tij të avokatisë.
