“Shpallja e gjendjes së jashtëzakonshëm ka një sërë kriteresh ligjore të përcaktuara qartë në ligjin 45 të vitit 2019 për “Mbrojtjen Civile”, por edhe në akte të tjera normative që përcaktojnë saktësisht kategorinë dhe momentin se kur mund të shpallet gjendja e jashtëzakonshme e fatkeqësive dhe në mënyrë të veçantë e fatkeqësive natyrore”.
Kështu deklaroi në një studio televizive Drejtori i Emergjencave Civile, Haki Çako.
I pyetur për akuzat e opozitës se qeveria nuk e shpall gjendjen e jashtëzakonshme sepse nuk ka fonde, Çako theksoi se “nuk shkon logjika me këtë konkluzion sepse qeveria shqiptare po tejkalon të gjithë detyrimet e saj dhe shembulli konkret është që ka dhënë në prefekturën e Korçës me tërmetin e 1 qershorit, atje ne jemi angazhuar maksimalisht per rehabilitim dhe kthimin në gjendjen e mëparshme, rindërtim e rikonstruksion të banesave. E njëjta gjë është bërë edhe gjatë 2018 ku ka pasur tërmete të tjera në Dibër. Në bazë të ligjit kemi kompensuar banorët”.
“Shqipëria prej disa kohësh është e karakterizuar nga një sërë fenomenesh natyrore që kanë ndikuar drejtpërsëdrejti në jetën e qytetarëve, por edhe në ekonominë e tyre. Pak ditë më parë kemi pasur një sërë zjarresh të shpërndarë në shkallë vendi, pavarësisht nga motivet e qëllimet por që kanë sjellë edhe ato pasojat e veta, siç ka ardhur pas kësaj edhe tërmeti të cilin po e menaxhojmë plotësisht, tërmet që nuk vjen në mënyrë të menjëhershme e spontane, pasi vendi ynë është një vend i rriskuar në aspektin sizmik”, nënvizoi Çako.
Lidhur me situatën në vend pas përmbytjeve, Çako tha se “situata është normale, është stabilizuar pas një stuhie gjatë gjithë natës dhe përballimin me sukses nga të gjitha strukturat e shtetit, por edhe angazhimit dhe predispozicionit që kanë treguar vetë të gjithë qytetarët me këto struktura”.
I pyetur nëse ka bilanc të dëmeve, Çako u shpreh se “ka të dhëna kronologjike gjatë ditës dhe grupe të caktuara konstatimi dhe vlerësimi janë në terren dhe do të vazhdojnë sepse do të duhet një kohë e konsiderueshme për të finalizuar një raport përfundimtar të dëmeve, me vlerën, por edhe me parashikimin se çfarë duhet të bëhet më tej për të rehabilituar situatën dhe rimëkëmbur gjithçka që është dëmtuar”.
/a.r
