Shirat e rëna gjatë fundjavës krijuan një situatë jo normale, duke shkaktuar dhe përmbytje në disa zona të vendit, teksa Ministria e Punëve të Brendshme njofton se situata ka shkuar drejt normalitetit gjatë orëve të pasdites së të dielës, teksa mëngjesin e sotëm kanë nisur rreshjet e para të dëborës në Kukës e Dibër.
Siç mësohet në mesditë dhe gjatë pasdites u mblodhën të gjithë Shtabet e Emergjencave në çdo Prefekturë.
Qarku Tiranë:
Prefekti i Qarkut Tiranë, ka nxjerrë një Udhëzim për situatën e krijuar nga rrëshqitja e dherave në rrugën “Karl Gega”. Drejtoria e Ujësjellës Kanalizimeve së Bashkisë Tiranë po punon për normalizimin e situatës së krijuar.
Në Laprakë dhe Bathore, në lagjen “Komuna e Parisit” dhe pranë ish-ekspozitës “Shqipëria sot” ka rënie të nivelit të ujit.
Aktualisht në autostradën Tiranë-Durrës qarkullohet pa probleme. Në lagjen “Don Bosko” ka ende prezencë uji në disa pallate dhe po punohet me mjetet e shërbimit zjarrfikës për largimin e tij. Për shkak të rritjes së nivelit të prurjeve të lumit të Tiranës, në Babru ka pasur dalje të ujërave jashtë shtratit duke rrezikuar përmbytjen e banesave.
Bashkia e Tiranës ka ndërhyrë dhe ka evakuuar disa familje. Në Paskuqan, Valias dhe Bregu i Lumit ka pasur prezencë uji në disa banesa. Forcat e Armatosura po punojnë me 3 motor-pompa për largimin e ujërave. Disa familje janë evakuuar edhe në Kamëz e Paskuqan, pasi në banesat e tyre ka prezencë uji.
Nënstacionet elektrike në Kombinat, Kamëz dhe Laknas kanë qenë të mbushura me ujë dhe si pasojë ka pasur ndërprerje të energjisë në këto zona, por pas ndërhyrjeve për largimin e ujit situata është normalizuar dhe është rikthyer energjia.
Probleme me ndërprerjen e energjisë ka pasur edhe në Shëngjergj e Paskuqan. Grupet e OSHEE janë në terren për riparimin e defekteve.
Qarku Kukës
Në qarkun e Kukësit, kanë filluar reshjet e dëborës në zonat malore mbi 1 mijë metër , por nuk ka probleme në akset rrugore.
Në të gjithë territorin e Bashkisë Tropojë, për shkak të erës së fortë, janë dëmtuar çatitë e 50 banesave. Gjithashtu janë dëmtuar dhe 2 ura, që lidhin Tropojën e Vjetër me Bajram Currin dhe ura që lidh lagjen Geghysenaj-Selim.
Komisioni i Emergjencave Civile në qark vazhdon të ndjekë situatën e krijuar nga reshjet e fundit duke ndërmarrë edhe masat parandaluese përkatëse.
Qarku Dibër
Me ndërhyrjen e 3 fadromave është zhbllokuar aksi në hyrje të qytetit Burrelit, ku pati rrëshqitje dherash.
Në zonën e Klosit me ndërhyrjen e Bashkisë dhe Drejtorisë së Bordit Kullimit u eliminuan pasojat e rrezikut të daljes së prurjeve të ujërave jashtë shtratit të kanalit të Klosit.
Në njësitë administrative dhe fshatrat ka disa dëmtime dhe bllokime të pjesshme të rrugëve, por më problem është dëmtimi i segmentit të fshatit Frankth dhe Bater ku është dëmtuar një urë e vogël. Do të ndërhyhet sa më shpejt nga firma ndërtuese, pë riparimin e saj.
Grupet e specialistëve të Emergjencave kanë nisur verifikimin e banesave të dëmtuara nga prezenca e ujit, ndërsa në Ulëz raportohet për rreth 30 shtylla elektrike të dëmtuara.
Qarku Durrës. Situata është drejt normalizimit në zonën më të prekur në Fushë-Krujë, pasi prurjet e lumit Zezë janë duke rënë. Furnizimi me energji elektrike po kryhet normalisht dhe hidrovorët po punojnë me kapacitet të plotë.
