Moti i keq që përfshiu vendin ditën e djeshme (22 nëntor) ka shkaktuar probleme në furnizimin me energji elektrike në disa fshatra në veri të vendit, e po ashtu janë bllokuar edhe disa akse rrugore.
Bëhet me dije se në bashkinë Shkodër, vijon të jetë i bllokuar aksi rrugor Prekal-Kir, ndërsa aksi Breg Lumi-Theth është pastruar nga inertet dhe është i qarkullueshëm. Kanali i Çentralit Ndërlysaj është mbushur me inerte dhe është jashtë funksionit, ndërsa në zonat malore të kësaj bashkie ka mungesë të energjisë elektrike.
Në Bashkinë Malësi e Madhe, gjatë mbrëmjes së djeshme është dëmtuar rruga e fshatit Kamicë si pasojë e vërshimit të Përroit të Thatë.
Në Bashkinë Vau Dejës, mungon energjia në të gjitha fshatrat e njësisë administrative Vig-Mnelë.
Në Bashkinë Fushë Arrëz vijojnë reshjet e shiut dhe era me intensitet të lartë. Ka ndërprerje të energjisë elektrike në njësitë administrative Iballë, Fierzë dhe Blerim. Qarkullimi në rrugët kryesore vijon, por ka prezencë uji dhe gurësh. Aksi rrugor Gjegjan-Shpal është i bllokuar në rreth 40%.
Në Bashkinë Pukë, problematika kryesore është dëmtimi dhe prezenca e materialeve në rrugët rurale. Në njësinë administrative Rrapë është dëmtuar ura e fshatit Kabash. Në fshatin Qerret raportohet dëmtimi i çatisë së një banese.
/a.r
