Gjatë 24 orëve të fundit janë raportuar 19 vatra zjarri në disa bashki të vendit, nga të cilat 6 vatra mbeten ende aktive, sipas njoftimit zyrtar të Ministrisë së Mbrojtjes. Zjarret janë përhapur në zona të mbuluara me shkurre, pemë dhe barishte, duke djegur gjithsej rreth 65 hektarë sipërfaqe.
Vatrat aktive aktualisht ndodhen në:
Elbasan – në vendgrumbullimin e mbetjeve, vijon puna për shuarjen e plotë.
Finiq (Sarandë) – vatra mes fshatrave Grazhdan dhe Malçan, afër zonës së Leshinicës së Poshtme.
Vlorë – në zonën “Sotiran” mes fshatrave Tragjas dhe Dukat, me tre vatra të shpërndara.
Poliçan – në fshatin Zgërbonjë, ku janë djegur rreth 50 hektarë.
Bulqizë – zjarri është përhapur nga “Livadhi i Peladhisë” drejt “Malit të Bardhë”.
Malësi e Madhe – në “Bjeshkët e Parrusë” ka pasur riaktivizim të zjarrit.
Përballë kësaj situate, janë angazhuar 37 automjete zjarrfikëse, 362 forca operacionale, 8 automjete të rënda, si dhe Forcat e Armatosura me 104 efektivë, 6 mjete zjarrfikëse, një pompë thithëse dhe një traktor me zinxhirë.
Sipas Institutit të Gjeoshkencave, për ditën e sotme pritet rrezik i lartë për zjarre në pothuajse të gjitha qarqet e vendit. Përjashtim bën qarku Durrës, ku rreziku vlerësohet i moderuar, por me mundësi të rritjes në zona të veçanta në jug të këtij qarku.
Raportimi i Ministrisë së Mbrojtjes:
Gjatë 24 orëve të fundit janë raportuar 19 vatra zjarri, nga të cilat 6 vatra janë ende aktive.
Këto vatra zjarri janë evidentuar në bashkitë e: Finiqit, Vlorës, Elbasanit, Poliçanit, Beratit, Hasit, Bulqizës, Malësisë së Madhe, Lezhës, Kolonjës, Korçës, Tiranës, Kavajës e Fierit.
Aktualisht mbeten aktive vatrat:
– Në vendgrumbullimin e mbetjeve, në bashkinë Elbasan, ku edhe sot vijon puna për shuarjen e plotë të vatrës, pas izolimit të saj nga forcat operacionale, ditën e djeshme.
– Puna vijon në vatrën e zjarrit midis fshatit Grazhdan, njësia administrative Livadhja dhe fshatit Malçan, njësia administrative Dhivër, bashkia Finiq. Gjatë natës forcat e MZSH Finiq dhe efektivët e Forcave të Armatosura qëndruan në monitorimin për të parandaluar ndonjë riaktivizim të mundshëm. Ditën e sotme zjarri vazhdon të jetë aktiv në zonën lindore të fshatit Leshinicë e Poshtme, por është larg zonës së banuar.
– Zjarri, në vendin e quajtur “Sotiran” ndërmjet fshatrave Tragjas dhe Dukat, njësia administrative Orikum, bashkia Vlorë vazhdon të jetë aktiv në tri vatra të shpërndara. Terreni e vështirëson ndërhyrjen, por zjarri nuk paraqet rrezikshmëri për zonën.
– Aktive mbetet vatra në fshatin Zgërbonjë, njësia administrative Vërtop, bashkia Poliçan. Gjatë natës vatra e zjarrit u mbajt në monitorim nga MZSH Poliçan dhe ditën e sotme kafilluar puna për shuarjen e plotë të vatrës së fundit aktive me 10 efektivë dhe 5 forca bashkiake. Sipas një informacioni paraprak nga shërbimi pyjor deri ditën e djeshme janë përshkuar rreth 50 ha.
– Në vendin e quajtur “Livadhi i Peladhisë”, njësia administrative Zerqan, bashkia Bulqizë, gjatë natës për shkak të erës dhe temperaturave të larta vatra e zjarrit është transferuar duke shtrirë në territor drejt “Malit të Bardhë”. Ditën e sotme në terren ndodhen1 automjet zjarrfikës me 11 efektivë, 5 forca pyjore dhe 10 forca bashkiake.
– Në vendin e quajtur“Bjeshkët e Parrusë”, njësia administrative Shkrel, bashkia Malësi e Madhe pati një riaktivizim të vatrës së zjarrit . Ditën e sotme në terren ndodhen 6 efektivë nga MZSH, 5 forca bashkiake, 5 forca nga shërbimi pyjor dhe 8 forca vullnetare.
Si pasojë e zjarreve të rëna kryesisht në sipërfaqe me pemë, shkurre e barishte janë djegur rreth 65 hektarë me bimësi.
Në operacionet për shuarjen e zjarreve u angazhuan 37 automjete zjarrfikëse dhe 362 forca operacionale si dhe 8 automjete të rënda. Gjithashtu në operacionet e ditës së djeshme morën pjesë edhe Forcat e Armatosura me 104 efektivë, 6 automjete zjarrfikëse, 1 pompë thithëse dhe 1 traktor me zinxhirë.
Bazuar në parashikimet e Institutit të Gjeoshkencave, sot pritet nivel rrezik “I LARTË” pothuajse në të gjitha qarqet.
Në qarkun Durrës pritet nivel rrezik “I MODERUAR” dhe lokalisht rrezik “I LARTË” vetёm nё zona tё lokalizuara, konkretisht: qarku Durrës (Jug).
I gjithë sistemi i mbrojtjes civile vijon të jetë në ndjekje të situatës dhe në gatishmëri të plotë për ndërhyrje të shpejtë.
Në këtë situatë u bëjmë thirrje të gjithë qytetarëve që të tregojnë përgjegjësi maksimale.
Mos ndizni zjarre në ambiente të hapura, mos digjni mbeturina, shmangni çdo veprim që mund të shkaktojë zjarr dhe njoftoni në kohë autoritetet vendore.
