Shtypi turk ka raportuar së fundmi se Turqia synon që të “mbyllë në magazinat e saj” sistemet raketore S-400 apo t’i transferojë ato në vende të tjera, në mënyrë që të bindë Uashingtonin për ta kthyer Ankaranë në programin e përfitimit të avionëve F-35.
Këto raportime duket se kanë vënë në lëvizje Rusinë, e cila ka shprehur hapur pakënaqësinë për to. Me rastin e këtyre publikimeve dhe skenarit të transferimit të sistemeve të armëve kundërajrore ka reaguar numri dy i Kremlinit, ministri i Jashtëm rus Sergej Lavrov.
Lavrov foli për ekzistencën e një “klauzole të përdoruesit fundor” në kontratën e furnizimit të nënshkruar nga Rusia dhe Turqia për S-400, e cila në thelb nuk lejon që Ankaraja t’i shesë apo transferojë ato në vende të tjera pa pëlqimin e Moskës, raporton A2.
“Kontratat e armëve përmbajnë një paragraf për certifikimin e përdoruesit përfundimtar. Për të bërë diçka tjetër me produktet e dorëzuara sipas një certifikate të tillë, e cila përmend vendin që merr këto armë si përdorues përfundimtar, kërkohet pëlqimi i vendit që i shet këto armë”, sqaroi ministri rus, përcjell A2.
Duke vënë në dukje se në të gjitha aspektet e tjera “nuk ka asgjë për të komentuar” blerjen nga Ankaraja të sistemeve të mbrojtjes ajrore S-400 nga Rusia, Lavrov shtoi: “Presidenti turk Rexhep Tajip Erdogan është një politikan me përvojë. Ai vendos gjithçka në interes të popullit dhe vendit të tij”.
