Sipërmarrës italianë dhe izraelitë, po ndërmarrin investime konkrete në sektorin e agrobiznesit shqiptar, në drejtim të implementimit të teknologjive të reja moderne për përpunimin e produkteve bujqësore.
Risi teknologjike në përpunimin e produkteve bujqësore u bënë publike në një konferencë kombëtare në Tiranë të organizuar nga Ministria e Bujqësisë dhe Ushqimit, Këshilli i AgrobiZnesit Shqiptar, Universiteti Bujqësor, ku merrnin pjesë edhe fermerë të interesuar nga i gjithë vendi.
Sipërmarrësi italian Angelo Amato, organizator i konferencës, u shpreh për ATSH-në, se tregu shqiptar po ofron për investitorët e huaj, gjithnjë e më shumë mundësi dhe klimë të lehtësuar për të bërë biznes.
Në këtu kushte, vijoi ai, po prezantojmë teknologjitë inovative italiane për të bashkëpunuar me agrobiznesin shqiptar, në përpunimin e produkteve bujqësore, me destinacion tregun e huaj.
“ Makineritë e teknologjitë e prezantuara të prodhuara nga kompanitë e pranishme, përmbushin të gjitha kërkesat në drejtim të cilësisë së produkteve, reduktimin e konsumit të ujit, energjisë dhe të uljes së kostos së prodhimit, si dhe reduktimin e ndikimit në mjedis dhe uljen e ndotjes”, tha ai.
Avner Galili, përfaqësues i kompanisë izraelite “JURAN”, prezantoi makinerinë bashkëkohore të përpunimit të shegës, e cila sipas tij është unikale në llojin e vet.
Teknologjitë izraelite, tha ai, po gjejnë një shtrirje të gjerë në sektorin e agrobiznesit shqiptar, duke dhënë një kontribut të madh në rritjen e efiçencës dhe cilësinë e prodhimit.
Një prej makinerive që tërhoqi vëmendjen e të pranishmëve ishte ajo për përpunimin e qumështit.
“Makineritë që do te vihen në dispozicion shërbejnë për fermat e vogla e të mesme, dhe ofrojnë cilësi të lartë përpunimi te produkteve vendase. Makineritë “CASARO”, për përpunimin e qumështit, funksionimi i të cilave bazohet në filozofinë “Të gjitha në një”, ofrojnë një rendiment mbi 65 përqind” tha përfaqësuesja Ivana Cerri raporton ATA.
Ndërsa Kreu i Këshillit të Agrobiznesit Shqiptar, Agim Rrapaj, vuri ne dukje se së shpejti nis programi 2017-2020, ku do të financohen rreth 2500 projekte në të gjithë vendin me një fond që arrin në 96 milionë euro, prej të cilave 25 përqind janë të Qeverisë Shqiptare./a.m.
