Kryeministri Edi Rama ka zhvilluar një vizitë zyrtare në Singapor, nga ku ka premtuar se në mandatin e ardhshëm, qeveria zotohet që të nisë punën për të paktën dy aeroporte të reja në vend.
“Për sa i përket infrastrukturës aeroportuale me fokus në radhë të parë turizmin, ne kemi bërë një punë të madhe këto vite për të krijuar kushtet që tanimë kanë tërhequr interesim shumë të madh, nuk është vetëm këtu, por edhe nga vende të tjera.
Besoj që në mandatin e ardhshëm do të kemi padiskutim fillimin e punës për të paktën dy aeroporte të reja” tha Rama.
Në lidhje me njohjen e Kosovës si shtet nga ana e Singaporit, Rama tha se ka qenë një hap I rëndësishëm që afron më shumë Shqipërinë me këtë vend.
“Ishte kënaqësi që të dëgjoja nga Kryeministri shprehjen e interesimit për reformat që kemi bërë në Shqipëri si dhe për mundësitë për t’u afruar më shumë dhe për të tërhequr më shumë përsa i përket biznesit.
Diskutuam edhe për rajonin. Singapori njohu pak javë më parë Kosovën, një hap shumë i rëndësishëm për Kosovën, por edhe një hap që na afron më shumë” – u shpreh Kryeministri Rama.
Përsa i përket bashkëpunimit të mundshëm ekonomik mes dy vendeve, Rama deklaroi se Singapori është i interesuar për manifakturën dhe agropërpunimin.
“Shqipëria ka disa potenciale të rëndësishme, por fokusi gjithmonë është energjia, nafta, mineralet dhe turizmi.
Ka interesim edhe për manifakturën apo agropërpunimin, gjëra të cilat ngjallën shumë interes dhe ishin materia e një diskutimi mjaft interesant.
Diskutuam me Kryeministrin edhe për shkëmbime në interesin tonë, për sa i përket administrimit fiskal, pasi këtu ka një dije të madhe dhe një infrastrukturë shembullore për administrim fiskal si dhe për rendin publik, ku Singapori është kampion për sa i përket mënyrës se si e ka të organizuar të gjithë strukturën dhe për mënyrën se si ka arritur të krijojë një hapësirë sigurie të madhe, parashikueshmërie të plotë dhe kontributesh të përbashkëta, në funksion të një shteti mjaft social.”/java/a.k
