Sikur liria jonë të ishte në dorë të Ministrit të Drejtësisë së Shqipërisë?

Nuk besoj se do të kemi një Kod Penal si ky që është shkruar nga “ekspertët” e Ministrisë së Drejtësisë, pavarësisht alarmit që na shkakton të gjithëve, por e sigurt është që nuk kemi Ministri Drejtësie.
Madje kemi një ministër tinzar, i cili jo vetëm e prezantoi dhe mori autorësinë për projekt-Kodin e ri, por filloi t’i sulmonte nën brez të gjithë aktorët e tjerë të drejtësisë që u distancuan nga bashkëpunimi me të. Më flagrant ishte sulmi ndaj Prokurorit të Përgjithshëm Olsi Çela, i cili i doli ballazi kundër gjithë përmbajtjes së Kodit dhe doktrinës së tij, duke distancuar institucionin e tij nga projekti. Fill pas kësaj, Ulsi Manja mbushi shtypin me një shkresë formale, ku një nëpunës i Prokurorisë kishte marrë njoftim para dy vitesh dhe kishte shprehur dakordësinë për bashkëpunim.

Në pamje të parë duket si një përpjekje në panik për të sulmuar “tradhtarin” e parë që doli hapur kundër, por në të vërtetë e gjithë kjo tregon një përpjekje tinzare për hartuar një Kod në fshehtësi, duke konsideruar si bashkëpunim një email të para dy viteve dërguar një zyrtari.
Pra në atë moment që Prokurori i Përgjithshëm doli kundër, Ministrit të Drejtësisë i ka punuar turri të hapë emailet, të gjejë një email të një nëpunësi të prokurorisë që i kanë dërguar letër dakordësimi para dy viteve dhe ta përdorë këtë për të “demaskuar” Prokurorin e Përgjithshëm që u distancua.

E njëjta frazeologji e rrumbullakosur u përdor dhe duke thënë që “na e ka kërkuar Bashkimi Evropian”, apo “është kërkesë e BE”, se po punohet me të gjitha institucionet etj.

Para disa ditësh kërkova që të bëhen publikë këta ekspertë anonimë që po punokan në emër të të gjithëve kur të gjithë janë kundër.

Sot thuajse të gjitha institucionet janë kundër. Përfshi dhe vetë Bashkimin Evropian. Kryeministri u distancua duke thënë që ende s’e ka prekur me dorë dhe se nuk do të kalojë një Kod që bie ndesh me parimet e Brukselit.
Dhe kemi arsye ta besojmë pasi në këtë rrugë ai nuk futet dot fshehurazi në BE, pasi do kalojë nga porta kryesore, pra do kontrollohet nga Bashkimi Evropian.

Kjo është dhe arsyeja që nuk do ta kemi Kod Penal këtë projekt-Kod.

Por ama fakti që Ministri i Drejtësisë është i qartë për çfarë ka bërë, dhe që në mënyrë tinzare përpiqet të mbrojë ata pavarësisht permbajtjes  mediokre, te lig, dhe kundër çdo lirie njerëzore, duke u përpjekur të inkriminojë dhe aktorë të tjerë të institucioneve të drejtësisë, madje dhe vetë Bashkimin Evropian, tregon se predispozicioni politik është në frymën e projektit dhe jo të Kodit evropian që me siguri një ditë do ta kemi. Pra duam apo s’duam ne, tinzaria e Ulsiut në këtë rast, nuk përfaqëson një projekt aksidental, por një test se deri ku mund të shkohet.

Tani u bë e qartë që atë projekt nuk e pranon as Bashkimi Evropian, as institucionet e drejtësisë në Shqipëri, as shoqëria civile, as mendimi kritik intelektual në vend, as opozita, madje madje dhe qeveria mbajti distancë. Nga kjo pikëpamje ky është një rast, kur Ulsiu nuk na bën dot dëm, pasi nuk është në dorë të tij, por të shumë aktorëve të tjerë.

Por mendoni një moment sikur liria juaj të ishte në dorë të Ministrit të Drejtësisë së Shqipërisë? Do na dukej Haxhi Lleshi si George Washington-i krahasuar me pasardhësit e tij dibranë që u kemi besuar “drejtësinë e re”.