Një shtetasi shqiptar – i cili është dërguar në qendrën e imigracionit në Harmondsworth, pranë aeroportit “Heathrow” javën e kaluar – i është thënë se do të përballet me dëbimin e menjëhershëm nga Mbretëria e Bashkuar.
Kjo, një ditë pasi Ministria e Brendshme shqiptare dhe ajo britanike njoftuan planet për të shpejtuar largimin e azilkërkuesve shqiptarë të refuzuar.
Dy fëmijët e tij kanë lindur në Mbretërinë e Bashkuar dhe kanë leje për të qëndruar.
“Është sikur kam një gju në qafë, sikur po më mbysin”, tha ai, duke folur nga qendra për prestigjozen “The Guardian”.
Burri, i cili po akuzohet për shkelje të rregullave të imigracionit pasi i janë shteruar të drejtat e tij për apelim, thotë se ka të drejtë për të jetuar aty pasi fëmijët e tij kanë lindur në MB dhe kanë leje për të qëndruar.
Ai beson se “Home Office” po synon në mënyrë të padrejtë shqiptarët.
“I gjithë ky vend është plot me shqiptarë. Duket sikur po na rrethojnë për të na futur në një fluturim charter nga këtu. Djali me të cilin po ndaj qelinë, dhe pjesa tjetër janë shqiptarë. Më shkoi në mendje se kjo është një hakmarrje ndaj nesh. Duket se qeveria po gjen boshllëqe për të na nxjerrë jashtë. Të gjithë janë kaq të shqetësuar dhe të frikësuar – ne nuk e dimë se çfarë do të ndodhë me ne”.
Të enjten, Ministria e Brendshme njoftoi një marrëveshje me qeverinë shqiptare, e cila synon të largojë azilkërkuesit e refuzuar “sa më shpejt të jetë e mundur” mes një rritje të numrit të mbërritjeve me varka të vogla nga Shqipëria.
Shifrat e fundit të publikuara nga zyrtarët tregojnë se 2 mijë e 165 shqiptarë mbërritën në Britaninë e Madhe me varka të vogla në gjashtë muajt e parë të 2022.
Nga të gjithë ata që hynë në Mbretërinë e Bashkuar përmes kësaj rruge, më shumë se gjysma ishin nga tre kombësi, me shqiptarë dhe afganë secili që përbënte 18% të të ardhurve.
Zyra e Brendshme synon të pengojë ata që kërkojnë të kalojnë Kanalin duke lëshuar paralajmërime se ata nuk do të kenë të drejtë të jetojnë ose punojnë në MB dhe mund të përballen me dënime me burg të shtuar për shkeljet e imigracionit.
Sipas saj, Shqipëria është një “vend i sigurt dhe i begatë” dhe shumë shtetas “po udhëtojnë nëpër vende të shumta për të bërë udhëtimin në MB” përpara se të bëjnë “kërkesa të rreme për azil kur të mbërrijnë”.
Shifrat e publikuara të enjten tregojnë se rreth gjysmës së të gjithë shqiptarëve që kërkojnë azil u jepet statusi i refugjatit.
Të dhënat tregojnë po ashtu se 21 persona janë larguar me forcë me arsyetimin se janë “të papranueshëm” për azil që nga Brexit, pavarësisht se ministrat zgjeruan fushën e këtij rregulli.
Sipas planeve të reja, oficerët e policisë shqiptare do të sillen në bregun e Kentit për të vëzhguar ardhjet e emigrantëve dhe për të shkëmbyer informacione me qeverinë britanike.
Departamenti nuk ka konfirmuar se kur do të paraqiten propozimet./m.j
