“Teksa siguria ushqimore mbetet një nga sfidat kryesore për integrimin e vendit në Bashkimin Europian, ajo që vihet re në vendin tonë është rritja e numrit të të pandehurve për çështje që lidhen me sigurinë ushqimore”, raporton gazetarja e Tv Klan, Erikleda Dorezi.
Të dhënat e Prokurorisë për vitin 2025, në raportin e dorëzuar në Kuvend, flasin për 44 procedime dhe 15 të pandehur. Kjo përbën një rritje prej 2,2 herë për procedimet dhe 2,5 herë për të pandehurit krahasuar me vitin 2024.
Ekspertët e konsiderojnë këtë fakt pozitiv, pasi tregon një rritje të kontrolleve që lidhen me sigurinë ushqimore.
“Do ta gjykoja pozitivisht, sepse do të thotë se kemi rritur kontrollet ndaj subjekteve që shkelin ligjin dhe prandaj kemi numër më të madh padish. Por 5 vitet e fundit BE e përmend gjurmueshmërinë dhe laboratorët, ku nuk ka më tolerim”, thotë Ilir Pilku, ekspert për çështjet e sigurisë ushqimore.
Aktualisht sfidat për sigurinë ushqimore lidhen që nga kushtet higjeno-sanitare e deri te gjurmueshmëria.
“Kushtet higjeno-sanitare janë primare, prandaj duhen investime për përmirësimin e tyre. Teknologjia e aplikuar kërkon investim tjetër nga subjektet dhe gjurmueshmëria është thelbësore. Pa një gjurmueshmëri të produktit ne nuk bëhemi pjesë e BE-së. Ne gjurmueshmërinë e kemi shumë pak dhe kjo është sfida më e madhe. Mënyra e inspektimeve nuk është më kjo, por tashmë kontrolle që duhet të jenë profesionale. Pastaj i takon biznesit nëse duhet të mbyllet apo të vijojë”, shton Pilku.
Janë mbi 2800 subjekte agro-përpunuese që kanë kaluar në sitën e kontrolleve dhe përshtatjen e prodhimit me të gjitha standardet e Bashkimit Europian.
“Aktualisht vlerësimi ka nisur me dy sektorët e parë: sektori i qumështit dhe ai i mishit, duke përfshirë edhe thertoret që po kalojnë në një sitë fillestar për kategorizimin e tyre. Janë 4 kategori: Klasa e 4: të detyruar të mbyllin biznesin; Klasa e 3: duhet të rregullojnë teknologjinë; gjurmueshmërinë dhe kushtet higjeno-sanitare; Klasa e 2: kanë gjëra minimale për të plotësuar; Klasa e 1: të gatshme për të penetruar në tregun europian. Është një sfidë e madhe, pasi ndalet në dy mënyra: ligjshmëria për kapitullin e 12 dhe zbatueshmëria”, vijon eksperti.
Mosplotësimi i kushteve të përcaktuara përbën rrezik për mbylljen e subjekteve në tregun ushqimor.
