Mos vendosja e rripit të sigurimit, xhamat e zinj, tejkalim shpejtësie dhe semafor të kuq janë ndëshkimet që policia e Tiranës u ka dhënë drejtuesve të mjeteve.
Sipas policisë gjatë 24 orëve të fundit, kontrollet janë përqendruar në vendosjen e rripit të sigurimit, në respektimin e semaforit, në vendosjen e kaskës mbrojtëse, respektimin e sinjalistikës për shpejtësinë dhe drejtimin e lëvizjes, në kontrollin teknik, xhamat e errësuar, në përdorimin e celularit gjatë drejtimit të automjetit, apo në drejtimin e mjetit nën efektin e alkoolit dhe në gjendje të dehur.
Gjatë kontrolleve, prioritet ishte edhe evidentimi dhe ndëshkimi i mitëdhënies, me qëllim shmangien e masave adminsitrative.
Kontrollet janë përqendruar në afërsi të semaforëve, ku punonjës policie me kamera, kanë evidentuar shkelësit e semaforit duke ia përcjellë informacionin patrullave të tjera të policisë rrugore, të cilat kanë bërë kapjen dhe procedimin administrativ të shkelësve.
Në këtë kuadër gjatë 24 orëve të fundit, janë evidentuar dhe ndëshkuar për shkelje të semaforit 17 raste.
Gjatë procedurave të plotësimit të masës administrative, një drejtues mjeti ka tentuar të korruptojë punonjësin e policisë duke i ofruar 2000 lekë për t’iu shmangur masës administrative, por u arrestua në flagrancë dhe konkretisht:
Lavdrim Çera, 34 vjeç, lindur në Dibër dhe banues në Kamëz, për kryerjen e veprës penale të “Korrupsioni aktiv i personave që ushtrojnë funksione publike”, parashikuar nga neni 244 i kodit Penal, pasi në vendin e quajtur “Kryqëzimi i Ysberishtit”, në rrugën “Sabaudin Gabrani” është konstatuar nga punonjësi i Komisariatit të Policisë Rrugore Tiranë, sepse duke drejtuar automjetin ka kaluar semaforin me dritë të kuqe.
Pasi punonjësi i policisë i ka dhënë shenjë të ndalonte, i ka komunikuar shkeljen administative dhe i ka kërkuar dokumentacionin e mjetit, shtetasi Lavdrim Çera i ka ofruar bashkë me dokumentat një kartmonedhë të prerjes 2 000 (dy mijë) lekë.
Gjithashtu janë ndëshkuar me masë administrative dhe dërguar në OASH:
51 drejtues mjetesh për mosvendosje të rripit të sigurimit
39 drejtues mjetesh për xhama të errësuar
18 drejtues për tejkalim shpejtësie tej normave të lejuara
17 drejtues për shkelje të semaforit
13 drejtues për mungesë dokumentacioni (kontroll teknik)
3 drejtues për gara shpejtësie
Gjithashtu janë ndëshkuar me masë administrative:
54 drejtues mjetesh për përdorim të celularit gjatë drejtimit të mjetit
16 drejtues për mosvendosje të kaskës mbrojtëse
Vlen të theksohet se gjatë 24 orëve të fundit nuk është evidentuar asnjë drejtues mjeti që të drejtonte mjetin nën efektin e alkoolit apo në gjendje të dehur.
Policia Rrugore e Tiranës në përmbushje të objektivit të vetëm, atë të rritjes së parametrave të sigurisë rrugore, do të vijojë kontrollet e pandërprera, për të parandaluar aksidentet rrugore./a.m.
