Vitin e shkuar humbën jetën në vendin e punës 33 shqiptarë. Ndonëse në pjesën më të madhe nga mungesa e sigurisë dhe kushteve të punës, në fund… faji u mbeti viktimave. Kodi i ri Penal parashikon gjoba deri në 1 vit burg për punëdhënësit që nuk ofrojnë kushtet e duhura të sigurimit teknik në punë.
“Në mënyrë absurde, shkelja e rregullave të sigurimit teknik në punë, kur ka sjellë pasoja të rënda për jetën dhe shëndetin e punonjësve konsiderohet vetëm kundravajtje penale dhe dënohet me gjobë ose deri 1 vit burg. Ky lehtësim i sanksioneve, në nje kohë kur kodi në çdo aspekt tjetër është bërë me represiv, është absurd, i padrejtë dhe i pabazuar në realitetin abuzivist që përjetojnë punonjësit çdo ditë në vendin tonë”, tha Gertjana Hasalla, nga Qendra për të Drejtat në Punë, shkruan A2 CNN.
Në përgjigje të këtyre shqetësimeve, Qendra për të Drejtat në Punë ka ngritur një grup pune që po shqyrton draft-kodin dhe po përgatit propozime për amendime, me qëllim rritjen e përgjegjshmërisë ligjore dhe sigurimin e dënimeve më të ashpra ndaj atyre që shkaktojnë rreziqe në vendin e punës.
“Në këtë fazë, qytetarët dhe organizatat janë të angazhuar që zëri i punonjësve të dëgjohet, duke kërkuar që ligji të mos jetë vetëm një dokument formal, por një mjet i fuqishëm për të mbrojtur jetën dhe dinjitetin e çdo punëtori në Shqipëri”, vijoi më tej Hasalla.
“Po çfarë duhet tjetër të kishte marrë parasysh Kodi i Ri Penal për të siguruar kushte të duhura pune për shqiptarët?”
“Një kod penal që do të respektojë jetën e punonjësve duhet të kthehet në një mjet serioz zbatimi dhe jo në një listë të thatë dënimesh të lehta që nuk i frikësojnë ata që nuk respektojnë ligjin”, vijoi Hasalla, shkruan A2 CNN.
Kodi i Ri Penal ka mundësinë të vendosë standarde të qarta dhe masa të rrepta për të garantuar kushte pune të sigurta dhe për të rritur përgjegjshmërinë e punëdhënësve. Nëse kjo sfidë adresohet me vendosmëri dhe zbatim efektiv, mund të shënojë një hap të rëndësishëm drejt përmirësimit të ambientit të punës dhe uljes së aksidenteve fatale në Shqipëri.
