Prostitucioni në Shqipëri duket se zhvillohet pasivisht nën sytë e drejtësisë, duke u maskuar si qendra masazhi, apo lokale striptizmi.
Megjithatë, trafikantët duket se tashmë kanë gjetur një metodë tjetër për të kryer këtë aktivitet kriminal. Ekzistojnë disa faqe online, ku klientët mund të bëjnë porosi për të marrë shërbime, kundrejt pagesës. Në këto faqe, pagesat variojnë nga ora 200 deri në 1000 euro.
Disa ditë më parë u arrestuan 7 vajza nga vende të ndryshme të botës, pasi u kapën në flagrancë duke ushtruar këtë aktivitet ilegal në vendin tonë.
7 vajzat e huaja ushtronin prostitucion nëpërmjet një faqeje online, ndërkohë tashmë ato janë lënë të lira nga gjykata, me masën e sigurisë “detyrim paraqitjeje”.
Një faqe online në internet iu shërbente vajzave të huaja që ushtronin prostitucion në Shqipëri për të marrë rezervime nga klientë të interesuar për shërbimet e tyre. Pas rezervimit, vajzat e moshës 20 deri në 30 vjeç kryesisht nga vendet e Amerikës latine, shoqëronin klientët shqiptarë në ambiente dhe hotele të ndryshme në këmbim të pagesës.
Nga veprimet hetimore ka rezultuar se shtetasja Beisi Yusmar Rojas Ruiz, me origjinë nga Kolumbia shfrytëzonte për prostitucion 6 vajzat e tjera të cilat kishin ardhur në Shqipëri nga Spanja, Kolumbia, Venezuela dhe Rusia.
Me një vëzhgim të thjeshtë në faqen online që shërben për të gjetur “Escort” rezulton që në këtë aktivitet të paligjshëm në Shqipëri, janë 581 vajza. Konkretisht 559 vajza operojnë aktivitetin e tyre të paligjshëm në Tiranë. 19 janë me bazë në Durrës ndërsa 3 të tjera janë me bazë në Sarandë.
Vetëm një regjistrim i thjeshtë për të bërë të mundur aksesimin e faqes online u kushton klientëve 30 euro, ndërsa më pas vendosen çmimet për secilën nga vajzat që mund të “rezervohen”.
Ndërkohë në faqen e këtij aktiviteti të paligjshëm vihet re se vajzat që ushtrojnë në Shqipëri vijnë nga vende të ndryshme të botës, ndërsa vetëm 5 prej tyre dinë të flasin shqip.
