Nga Mero Baze
Portali i familjes së Sali Berishës botoi një javë para gjyqit të Apelit për masën e sigurisë ndaj Erion Veliajt, një sërë shkrimesh, se gjyqtarit Ergert Pëllumbi i janë ofruar 2 milionë euro për lirimin e Veliajt. Të gjitha ishin shpifje të tyre.
Pas disa zërave publike, që SPAK duhet të hetonte rreth këtyre sulmeve mbi gjyqtarin, Berisha dhe njerëzit e tij u frikësuan se do të niste hetim dhe nisën të “prodhojnë fakte” që kishin dëgjuar si thashetheme.
Përmes njerëzve të lidhur me Berishën filluan t’i çojnë fjalën në qeli Erion Veliajt se kundër tij janë paguar 2 milionë euro dhe, nëse donte të shpëtonte, duhej t’i paguante edhe ai aq, nëse donte të shpëtonte.
E gjithë kjo është një sajim i Berishës dhe njerëzve të tij pranë Veliajt, për t’i dhënë një bazë sulmeve që po bënin ndaj gjyqtarit Pëllumbi.
Veliaj nuk ka rënë në këtë kurth.
Për ta bërë të besueshme, njerëzit e Berishës kishin shpikur si ndërmjetës një politikan të PD-së dhe një biznesmen, që është afër Berishës dhe Metës dhe që kohët e fundit është afruar edhe me Bashkinë e Tiranës.
Së paku, politikanin e PD-së që përflitej e njoh dhe jam i sigurt që nuk është përfshirë në këtë histori. Për atë biznesmenin nuk vë bast se çfarë mund të ketë thënë rrugëve, por këtë le ta hetojë SPAK-u.
Pra skena që ata pretendonin, nuk ishte që Veliaj ofronte pare për të blerë Pëllumbin, por që njerëz të Berishës i ofroheshin Veliajt të blinin Olsi Dadon, gjë që është sajuar sa të justifikonin shpifjet që kishin bërë.
Pavarësisht kësaj, jam i bindur që oferta për Veliajn nuk ka ndodhur dhe e gjitha u sajua nga Berisha dhe portali i tij, pasi u trembën se SPAK-u do niste hetimet për sulmet e tyre ndaj gjyqtarit Pëllumbi, që e akuzonin se kishte marrë gjoja 2 milionë euro.
Në gjithë këtë histori, SPAK ka qenë korrekt në zbardhjen e skemës, pasi ka thirrur politikanin e PD-së dhe biznesmenin, dhe ka marrë versionet e tyre.
Më shumë sesa rrjedhje informacioni tek Syri, ka qenë vetë Syri që, pasi shpiku informacionin, po përpiqej të krijonte inskenime me lajmin që më parë e kishin shpikur, por që në fakt dështuan.
As Erion Veliaj nuk ra në kurthin e shpikjeve të tyre, dhe as që besoj që ai politikani i PD-së që u thirr në SPAK ka qenë një ndërmjetës në këtë histori, duke u paraqitur si shok i Olsi Ramës. Është thjesht një sulm i pistë i Berishës ndaj gjyqtarit Pëllumbi, që më pas u përpoq ta ilustronte “me fakte” po të shpikura.
