Ministri i Brendshëm Fatmir Xhafaj deklaroi mbrëmjen e sotme se janë vënë në pranga personat që tentuan të godasin me thikë trajnerin e Vllaznisë Ernest Gjoka. Lajmin për arrestimin e autorëve, ministri Xhafaj e dha gjatë një interviste në emisionin “Përballë”.
“Nga Policia dhe prokuroria sapo u njoftova se kanë arrestuar autorët e plagosjes dhe sulmit të trajnerit të ekipit të ‘Vllaznisë’ në Shkodër”, deklaroi ministri Xhafaj.
Pas kësaj deklarate, Policia e Shkodrës ka publikuar edhe detajet për ngjarjen e zbardhur dhe emrat e dy autorëve të sulmit.
INFORMACIONI I POLICISE
Strukturat e Drejtorisë Vendore dhe Komisariatit të Policisë Shkodër, në bashkëpunim të ngushtë me Prokurorinë, falë një pune intensive hetimore dhe të pandërprerë, identifikuan dhe arrestuan shtetasit:
- Nehat Fojleta, 19 vjeç, banues në Shkodër
- Sehar Xhenje, 21 vjeç, banues në Shkodër
Arrestimi i tyre u bë pasi më 22 shkurt 2018, rreth orës 17:00, në afërsi të fushës sportive, shtetasi Nehat Fojleta është afruar duke kanosur dhe goditur trajnerin e ekipit të futbollit “Vllaznia”. Më pas ai është larguar me mjetin tip “Benz” me targa AA 282 KR. Drejtues mjeti ka qenë shtetasi Sehar Xhenje i cili ka ndihmuar të largohen nga vendi i ngjarjes.
Në cilësinë e provës materiale u sekuestrua mjeti që shërbeu për largimin e autorit të dyshuar pas sulmit.
Në bashkëpunim të ngushtë me Prokurorinë, po punohet intensivisht për zbardhjen e motiveve dhe qëllimit të kësaj ngjarjeje
Materialet iu referuan Prokurorisë së Rrethit Gjyqësor Shkodër, për veprën penale “Vrasje e mbetur në tentativë” dhe “Deklarata e rreme përpara oficerit të policisë gjyqësore”.
(Balkanweb)
