Zbardhet formula e përllogaritjes së pikëve për maturantët, që do të garojnë këtë vit për të fituar një nga 23 degët e inxhinierisë.
Autoritetet drejtuese të Universitetit Politeknik të Tiranës bëjnë me dije se iu qëndrojnë besnikë të njëjtave kritere nga viti i kaluar, mbi bazën e të cilëve do të bëhet pranimi i studentëve të rinj për vitin akademik 2018- 2019.
Mesatarja e gjimnazit bashkë me ato të tri gruplëndëve formuese: Matematikë, Fizikë dhe Kimi do të jenë dy treguesit kryesorë, mbi bazën e të cilëve do të rekrutohen më të mirët te Politekniku. Ky universitet, bashkë me atë të Mjekësisë është ndër të paktët me një formulë të qëndrueshme në vitet e aplikimit, sipas ligjit të ri të arsimit të lartë, duke bërë më të lehtë orientimin e të rinjve drejt profileve që dëshirojnë.
Brenda pak kohësh, pritet që qeveria të shpallë me një vendim të posaçëm notën mesatare minimale për aplikim që në tri vite ka qenë 6, e që me gjasë kaq do të jetë edhe këtë vit akademik, shkruan “Panorama”.
KRITERET
Rëndësia e provimeve me zgjedhje për ata që do të garojnë te Politekniku është zero. Në formulën e përllogaritjes së pikëve (përshkruar në tabelën përbri) ata, që kanë ndritur përgjatë gjithë viteve të maturës duke gëzuar një mesatare të lartë, e veçanërisht në tri lëndë që kanë lidhje me profilet e universitetit, do të jenë favoritë për të fituar një nga degët Universitetit Politeknik.
Dy komponentët e lartpërmendur nuk do të kenë vlerë të njëjtë. Peshën më të madhe të pikëve e kanë tri vitet e gjimnazit, më konkretisht 70%. Ndërsa pjesa tjetër ndahet midis tri lëndëve: Matematikë, Fizikë e Kimi ku secila ka një rol të diferencuar, (sipas koeficienteve të përcaktuar në formulën përkatëse). Rezultati i vlerësimit nga formula e përshkruar më lart, e pasqyruar dhe në tabelën që shoqëron shkrimin, do të ponderohet me koeficientin e shkollës së mesme, i cili është i ndryshëm për çdo program studimi.
Thënë në mënyrë të përmbledhur, 23 profilet e studimit në Universitetin Politeknik të Tiranës, në kriteret e pranimeve të reja iu japin përparësi nxënësve me mesatare të lartë në tri vitet e gjimnazit dhe në tri lëndët kryesore për formimin e një profesionisti.
