Si asnjëherë tjetër, Bashkia e Tiranës këtë vit ka menduar ta zbukurojë kryeqytetin. Por, duket se vendosja e një fshati Krishtlindjesh në sheshin “Nënë Tereza” ka rezultuar një ide e suksesshme. Jo pak njerëz i janë drejtuar çdo ditë aktiviteteve që Bashkia e Tiranës organizon aty, por edhe lojërave e argëtimeve pa fund.
Më shumë nga të gjithë, kësaj feste i gëzohen fëmijët, siç duket edhe nga fotot e kësaj atmosfere të pazakontë. “Qindra qytetarë nga Tirana dhe rrethet çdo ditë te markata e festave. Qyteti është si pista e patinazhit, gjërat ecin më mirë kur i japim dorën njëri-tjetrit, kur biem e ngrihemi prapë”, shkruan kryebashkiaku Veliaj në Facebook.
