Nga Alfred Peza
Politizimi i kauzës së artistëve për çështjen e shembjes ose jo të godinës së Teatrit Kombëtar, ku në vend të saj po kërkohet të ndërtohet një godinë të re sipas modelit të Arenës Kombëtare të Futbollit, “nuk është një gjë e mirë”. Ish ministri i Jashtëm Besnik Mustafaj, tha se politizimi i një kauze të tillë i bën dëm asaj. Do të doja që të kishte një vëmendje më të madhe për kët kauzë, jo nga opozita, por nga shoqëria civile.
Ky nuk është i vetmi rast, kur opozita jonë e politizon dhe tenton ti përvetësojë duke dashur ti bëjë të vetat, kauzat e të tjerëve. Ndaj, duket sikur kemi të bëjmë thjeshtë dhe vetëm me tentativën e radhës, për të politizuar kauzën e radhës. Sepse një tendencë e tillë, është shndërruar në rregull dhe pothuajse në një mënyrë ekzistence për opozitën.
Eshtë e vërtetë që çdo opozitë në botë, kërkon ta rrëzojë qeverinë që në ditën e parë të krijimit të saj mundësisht, për tu rikthyer vetë një minutë e më parë në pushtet. Kjo filozofi zbatohet në formën e qëndrimeve dhe artikulimeve politike, ku opozita pothuajse nuk duket të jetë asnjëherë dakord me zgjidhjet, vendimet dhe propozimet që bëhen nga mazhoranca.
Në vendet me demokraci të konsoliduar, opozita bëhet nëpërmjet oponencës, ofrimit të propozimeve, projekteve alternative, aksioneve, kauzave, protestave dhe “luftës” verbale publike. Kjo vijimësi e bën shumicën e qytetarëve ta shohin qeverisjen, me sy gjithnjë e më kritik. E më pas, sa më shumë i afrohemi ditës së zgjedhjeve të reja, aq më shumë ato shohin tek opozita e tyre, alternativën reale të pushtetit derisa ia ofrojnë atë, me anë të votës së tyre.
Praktika e demokracisë shqiptare ka treguar se opozitat tona, sikundër edhe mazhorancat, nuk janë edhe kaq të përkora në ushtrimin e të drejtave të tyre. Pasi shpeshherë, përballja publike dhe institucionale, ngjason gati gati me një ndeshje për jetë a vdekje, pa rregulla e pa principe, ku goditja poshtë brezit nuk është se konsiderohet, si ndonjë faull edhe aq i rëndë.
Mazhorancat në përgjithësi kanë frikë se qytetarët do ia shohin si dobësi tërheqjen, modifikimin apo korigjimin e nismave të diskutueshme, apo zgjidhjeve të pa menduara e të papeshuara, të cilat kërkojnë e hajnë debat. Ndërsa opozitat tona, mund të quhen ndryshe edhe si opozitat e “JO”-së. Sepse për çdo gjë, për çdo rast, për çdo opsion, alternative dhe për çdo hap që hedh qeveria apo përfaqësuesit e mazhorancës në Parlament, ato thonë vetëm: JO. JO. Dhe vetëm JO.
Eshtë kjo edhe arësyeja se përse ka kaq shumë tension në ajër, në koridoret e pushtetit të Tiranës, që duket sikur përshkrohen papushim, nga fusha magnetike me ngarkesa negative. Duke ndikuar me apo pa dashje, edhe në mënyrën e të jetuarit dhe të të perceptuarit të politikës nga qytetarët. Si në një gjendje para cunamit apo uraganeve. Duke bërë që dritat e alarmit politik, të qëndrojnë të ndezura pothuajse gjithmonë, tek e kuqja e rrezikut adekuat.
Protesta e artistëve të Teatrit Kombëtar për ruajtjen e godinës, nuk është e vetmja kauzë, që është politizuar nga opozita. E tillë ishte edhe kauza e qytetarëve të Kukësit, që u ngritën pak javë më parë në protestë, të shtyrë vetëm nga interesi i vet financiar, kundër tarifave të larta të kalimit të automjeteve në Rrugën e “Kombit”. Ashtu sikundër kanë qenë më parë, edhe kauzat e banorëve të Zharrëzit për dëmet që u sillte në banesa e prona lëkundjet nga shpimet e një kompanie nafte. Apo protesta e naftëtarëve të Ballshit që marshuan në këmbë drejt Tiranës për të drejtat e tyre, etj.
Këto dhe shumë kauza të tjera të qytetarëve dhe grupeve të ndryshme të interesit, për shkak të politizimit dhe tentativës së instrumentalizimit nga opozita për qëllimet e politikës së saj të ditës, i ka çuar ato drejt dështimit dhe kompromentimit. Në vend që ta dëmtonin mazhorancën, me anë të kësaj mënyrë të të bërit opozitë, ajo e ka nxjerrë në çdo rast qeverinë nga situatat.
Ndoshta është kjo arësyeja se përse pas dështimit të çdo kauze, qeveria “Rama” është dukur gjithnjë e më e fortë në sy të qytetarëve dhe opozita vetë pas kësaj, të perceptohet si gjithnjë e më e dobët. Në këtë mënyrë, opozita jonë pa e kuptuar as vetë, në vend që tia shkurtojë po e ndihmon qeverinë, që të duket sikur po i shton ditët e qëndrimit të saj në pushtet
a.ç
