Varreza masive e zbuluar të enjten në Përmet nuk i përket ish të përndjekurve në periudhën e diktaturës së komunizmit, por nga rezultatet paraprake mendohet se është një varrezë e periudhës mesjetare.
Ministria e Kulturws, thekson se grupet ende në vendndodhje, duke bërë monitorimin e plotë të zones, ndërkohë që në ditët në vijim mund të bëhen edhe gërmime arkeologjike.
Varret u zbuluan nga firma ndërtuese, e cila merret me shtrimin e rrugës në lagjen e re të Përmetit.
Menjëherë janë njoftuar autoritetet policore të cilët më pas kanë rrethuar zonën.
Në lidhje me këtë çështje ka reaguar edhe ministrja e Kulturës Elva Margariti.
Njoftimi i Ministrisë së Kulturës
Një varrezë mesjetare zbulohet në Përmet!
Gjatë monitorimit të punimeve për zbatimin e projektit Task 5, “Për zhvillimin e integruar urban dhe turistik Berat- Përmet”, dolën në dritë disa varre.
Drejtoria Rajonale e Trashëgimisë Kulturore, Gjirokastër ndërmori menjëherë pezullimin e punimeve, dhe në datën 07.07.2021 specialistët tanë realizuan inspektimin dhe vlerësimin e gjetjeve arkeologjike në terren.
Nga rezultatet paraprake mendohet se kemi të bëjmë me një varrezë të periudhës mesjetare.
Në mbledhjen e djeshme të Këshillit Kombëtar të Trashëgimisë Kulturore Materiale u diskutua dhe u përcaktua kryerja e gërmimit arkeologjik të shpëtimit nga ana e Institutit Kombëtar të Trashëgimisë, për varrezën e identifikuar.
Rezultatet e gërmimit arkeologjik të shpëtimit, do të paraqiten për shqyrtim në mbledhjen e ardhshme të Këshillit Kombëtar.
Kreu i shoqatës anti-komuniste të të përndjekurve politikë, Nebil Çika u shpreh se ky vend ka shërbyer për ekzekutimin e disidentëve dhe kundërshtarëve të regjimit dhe ka qenë hapësirë e Ministrisë së Punëve të Brendshme.
Prokuroria, më herët deklaroi se po pret ekspertët e monumenteve dhe mjekësisë ligjore pasi dyshohet, sipas saj, nga vlerësimet varret janë më të hershme.
g.kosovari
