Drejtori i Burgut të Reçit në Malësinë e Madhe, Ervis Zika, është arrestuar nga Shërbimi i Kontrollit të Brendshëm të Burgjeve.
Drejtori Zika është vënë në pranga mesnatën e 26 prillit pasi dyshohet se ka hyrë në regjim pa kaluar në skaner dhe ka futur brenda burgut sende të ndaluara kundrejt pagesave. Po ashtu, dyshohet se ka lejuar futjen e sendeve pa kontroll brenda mjediseve të Burgut të Reçit.
Një tjetër akuzë që rëndon mbi të është edhe firmosja fiktive e kartelave të karburantit. Në këtë mënyrë pas informacioneve të siguruara për këto veprime, SHKBB-ja ka vënë në pranga zyrtarin e lartë. Ervis Zika ishte i komanduar në krye të Burgut të Reçit, ndërsa edhe pse në rolin e drejtorit dyshohet se ka përfunduar duke shpërdoruar detyrën dhe duke kryer vjedhje.
Ervis Zika u arrestua nga Shërbimi i Kontrollit të Brendshëm të Burgjeve, me urdhër të Prokurorisë së Shkodrës. Ndaj drejtorit është caktuar masa e arrestit me burg dhe pezullimi i ushtrimit të një detyre nga shërbimi publik.
AKUZAT
Sipas burimeve pranë Prokurorisë së Shkodrës, drejtori i komanduar i Burgut në Reç, ka lejuar futjen e sendeve pa kontroll brenda ambienteve të burgut dhe në mënyrë që të shmangte skanerin, Zika ka kaluar vetë me sende të ndaluara për t’ia dhënë të dënuarve në regjim. Por, Ervis Zika akuzohet edhe për vjedhje. Dyshohet se drejtori ka marrë karburant duke firmosur kartela fiktive, skandal për të cilin, burimet thonë se janë në hetim edhe persona të tjerë, që kanë pasur dijeni dhe kanë lejuar veprimet e kundërligjshme të drejtorit. Ky rast i rëndë, tashmë është në duart e drejtësisë për t’u hetuar dhe gjykuar.
Burgu i Reçit është një investim i viteve të fundit me një sistem sigurie të lartë ndryshe nga burgjet e vjetra të Shqipërisë me qëllimin për të mos lënë asnjë mundësi abuzimi që brenda mjediseve të futen sende të paligjshme për të burgosurit apo edhe të lejohet abuzimi për pajisjen e të burgosurve me mjete komunikimi që nuk lejohen. Për shkak të këtij sistemi sigurie, drejtori Zika dyshohet se ka kaluar regjimin pa u futur në skaner.
Tashmë, pritet që drejtori i arrestuar të njihet me masën e arrestit përpara Gjykatës për të dhënë versionin e tij. Para arrestimit, Zika është telefonuar nga zyrtarët e SHKBB-së, duke iu thënë se po shkonte në krye të detyrës pa e ditur se do të prangosej. Ervis Zika u komandua si drejtues gjatë muajit janar, pas pezullimit nga detyra të drejtori Maliq Meta./ Panorama/
/b.h
