Helmi i akrepit është një nga lëndët më të shtrenjta. Një lëng i tillë i nxjerrë nga bishti i akrepit arab Androctonus crassiacauda kap vlerën e 13000-19000 euro për gram. Helmi i akrepit mund të përdoret për kurimin e lupusit, artritit rheumatoid. Ndërsa mjekësia po eksploron mundësinë e përdorimit të tij për të kuruar sëmundje të rënda si skleroza e shumëfishtë apo kanceri.
Një kompani në Turqi po e kthen në biznes këtë lëndë. Dr. Figen Caliskan, biologe, drejton një ekip në Universitetin Eskisehir Osmangazi të Turqisë. Ajo i ka studiuar akrepat dhe helmin e tyre për dekada të tëra. Por dy vjet më pare, asaj dhe ekipit që drejton iu ofruan një grup investitorësh, që donin ta shfrytëzonin ekspertizën e tyre për të prodhuar antivenom, me qëllim shitjen e tij në të gjithë Lindjen e Mesme dhe Afrikën, për të trajtuar njerëz që u rrezikohet jeta nga pickimi i një akrepi.
Kompania fillestare me të cilën punon Caliskan, Albila, ka marrë një capital fillestar prej 3.8 milionë dollarë, nga një grup prej 40 investitorësh. Firma pret t’i kthehet mbrapsht investimi brenda një viti dhe investitorët të marrin fitimet e një biznesi të suksesshëm brenda një periudhe katër deri në shtatë vjet, raporton Financial Times.
Skena e investimeve të huaja në Turqi është zgjeruar me shpejtësi vitet e fundit, falë përmirësimeve që qeveria u ka bërë ligjeve. Në vitin 2013, vendi ka marrë 14.7 milion euro investime të kësaj natyre, ndërsa në vitin 2017, kjo shifër arriti 52.3 milionë euro – e pesta në listën e më të lartave në Evropë.
Ideja për kompaninë “Albila” u frymëzua nga dy vëllezër nga qyteti juglindor i Urfa, pranë kufirit të Turqisë me Sirinë, të cilët mblidhnin akrepa gjatë natës duke përdorur dritën ultravjollcë.
Emine Sabanci Kamisli, pjesëtare e një prej familjeve më të mëdha të biznesit në Turqi, pa në televizor apelin e dy vëllezërve për ndihmë në mbledhjen e akrepave për shitje. Asaj i lindi ideja e e komercializimit të helmit dhe, pas kryerjes së studimeve të fizibilitetit dhe bashkimit me laboratorin në Eskisehir, në gjysmë të rrugës midis Stambollit dhe Ankarasë, ata krijuan Albilën. Të dy vëllezërve sirianë iu dhanë aksione në kompani.
Ekipi i Dr. Caliskan ua nxjerr me dforë helmin 2 000 akrepave të tyre. Helmi u injektohet kuajve dhe sistemi i tyre imunitar fillon të prodhonë antivenom (antihelm). Plazma pastaj merret nga kuajt dhe dorëzohet në laboratorin e Albilës, ku testohet dhe përpunohet nga shkencëtarët, të cilët e kthejnë atë në një produkt mjekësor të certifikuar. Shishja e parë e këtij helmi duhet të jetë e gatshme për shitje në muajt e ardhshëm. Albila e bëri financimin para se të niste kriza e lirës turke dhe tani planifikon të eksportojë 75% të prodhimit./a.meta
