Kandidatët infermierë që kanë aplikuar në portalin “Infermierë për Shqipërinë” mund të shohin kualifikimin ose jo të tyre.
Kështu njofton Ministria e shëndetësisë, teksa thekson se sot është afati i fundit i ankimimit për infermierët të cilët nuk janë kualifikuar për testim.
Ministria e Shëndetësisë dhe Mbrojtjes Sociale ka shpallur listat e kandidatëve që kanë aplikuar nëpërmjet portalit “Infermier për Shqipërinë. Kanditatët që nuk janë kualifikuar, kanë kohë deri në fund të ditës së sotme për paraqitjen e ankimimit të tyre në portal ose pranë Ministrisë së Shëndetësisë dhe Mbrojtjes Sociale.
Pas verifikimit të ankesave më datë 15 mars ministria e shëndetësisë do të shpallë në portalin “Infermier për Shqipërinë”, listën përfundimtare të kandidatëve që plotësojnë kushtet dhe kriteret e veçanta për testimin sipas profileve të kërkuara, si dhe datën, vendin dhe orën e saktë ku do të zhvillohet testimi me shkrim. Shpallja e datave të testimit bëhet publike në Platformë dhe kandidatët njoftohen elektronikisht për datën dhe vendin e testimit. Lidhur me testimin, mësohet se do të ketë dy pjesë:
– Pyetje rreth bazës ligjore që rregullojnë kujdesin shëndetësor, çështjet që lidhen me etikën dhe komunikimin e infermierëve (20 pikë);
– Pyetje rreth kujdesit infermieror bazë dhe specialiteteve (50 pikë).
Pas testimit, pikët e grumbulluara për secilin aplikant shpallen në Platformë në rubrikën Shpallje dhe fituesit lajmërohen për të ndjekur procedurën për punësim sipas renditjes në listën e shpallur për cdo QARK.
Në bazë të renditjes së shpallur kush merr më shumë pikë do të ketë mundësinë e zgjedhjes për punësim në shërbimet e kujdesit parësor apo Spitalor.
Aktualisht janë në dispozicion 420 vende të lira pune për infermierë, fizioterapeutistë dhe teknikë imazherie.
