Detaje të tjera dalin në dritë nga hetimi për grupin kriminal të “të fortit” të “Myslym Shyrit”, Gjergj Cukali. Ky i fundit u arrestua nga operacioni “Tangent” dhe u zbulua se ishte furnitori kryesor i disa grupeve që shpërndanin kokainë në kryeqytet.
Por nuk mbaron me kaq. Cukali kishte grumbulluar aq kapital me para droge, saqë kishte nisur të jepte edhe fajde, si edhe në shumë raste jepte kokainë pa para, por në këmbim mbante peng mjete luksoze.
Burimet thanë për “Panorama” se grupi kishte krijuar edhe “klientë” të rregullt, të cilët mund të merrnin sasi të ndryshme kokainë edhe pa para.
Por në rast se shlyerja e parave nuk kryhej brenda muajit, ata duhej të linin një garanci tek Cukali, derisa të bënin pagesën.
Kryesisht si garanci dorëzonin çelësat e makinave. Policia tha dje se 15 çelësa të tillë makinash, që ishin lënë peng për paratë e drogës, u sekuestruan gjatë operacionit.
Njerëz të ndryshëm shkonin se Cukali për të marrë kokainë pa para dhe linin te ai makina luksoze si garant për kthimin borxhit. Ndaj edhe e arrestuara Vjollca Gjoka mbante një listë të borxhlinjve të drogës./panorama/a.k
