Ato vija të përcaktuara pas Luftës së Dytë Botërore kanë vazhduar të ekzistojnë edhe më pastaj, pra edhe gjatë viteve shtatëdhjetë, kohë së cilës i referohen pjesëmarrësit tanë në procesin e demarkacionit.
Por ndryshe nga ç’thonë këta, edhe në vitin 1945, edhe gjatë viteve ’70, kufiri i Kosovës me Malin e Zi ka qenë në Çakorr, në Qafë të Diellit dhe në Kullë, si kufi historik (që e vërteton qind për qind deklarata e Gjilasit, i cili ka qenë personi më i rëndësishëm në këtë proces), por edhe hartat që mund t’i konsultojë kushdo qoftë pa mund të madh, ka shkruar Zejnullah Gruda në vazhdimin e dytë të serisë “Konteksti ndërkombëtar dhe ish-jugosllav i demarkacionit”, e botuar në numrin e Kohës Ditore.
Çfarëdo shmangie nga vija e Çakorrit, Qafa e Diellit, Kulla etj., jo vetëm që nuk ka mbështetje në faktorë gjeografikë, hidrologjikë, në histori, në parimin etnik, në arsye ekonomike, në arsye strategjike, por, përkundrazi, përbën shkelje të vrazhdë të të gjitha parimeve progresive dhe rregullave elementare të së drejtës ndërkombëtare, dhe s’janë gjë tjetër pos vazhdim i politikave gllabëruese të qarqeve imperialiste të fqinjëve.
