Nga 20 marsi deri në 02 korrikun e 2019, pavarësisht se është President i Republikës, Ilir Meta ka treguar se nuk ndihet rehat në atë karrige ku Rama e uli në 24 korrik 2017, duke folur më shumë si opozitar i vërtetë përballë Kryeministrit sesa si Kryetari i Shtetit.
Meta e pranonte krizën e rëndë politike ku po futej vendi që në muajin Mars, teksa shprehte hapur kundërshtinë e tij me veprimin ekstrem të opozitës së drejtuar nga Basha dhe Kryemadhi për djegien e mandateve.
Por, “bomba” që lëshoi asokohe Presidenti lidhej me “Juntën Ushtarake” që sipas tij do të krijonte Edi Rama dhe përballë së cilës ishte i gatshëm të vetësakrifikohej si ish-Presidenti i Kilit, Salvador Allende.
1- (Salvador Guillermo Allende ishte President i Kilit nga viti 1970 deri në vitin 1973. Më 11 shtator 1973, ushtria tentoi të rrëzonte Allenden me një grusht shteti, por kur trupat rrethuan pallatin “La Moneda”, ai dha fjalimin e tij të fundit duke u zotuar të mos japë dorëheqjen dhe po atë ditë vrau veten me një AK47 që ia kishte dhuruar Fidel Castro)
Ashtu si Allende që për 40 vite drejtoi politikën kiliane, Ilir Meta prej 30 vitesh ka dominuar politikën shqiptare duke mbajtur postet më të larta shtetërore si Kryeministër, Kryetar Kuvendi dhe President.
Por krahasimi që i bëri vetes me Presidentin e ndier kilian doli thjesht një blof për Kreun e Shtetit, që ndezi edhe më tepër gjakrat në politikën shqiptare duke krijuar një hendek të thellë midis opozitës dhe mazhorancës që kurrë nuk i çoi drejt dialogut.
Tashmë që dështimi i parë me tezën e vetësakrifikimit për Shqipërinë u certifikua me 30 qershorin, ku zgjedhjet u zhvilluan ndryshe nga çfarë vendosi ai, Ilir Meta doli sot në fushë-betejë me kartën e vjetër, por me histori të ngjashme sakrifikimi – të cilave u ndryshojnë vetëm personazhet.
Një lumë heronjsh të historisë së Shqipërisë nga 1881 e në vazhdim përmendi Kreu i Shtetit në deklaratën e sotme për mediat ku i vetëm i sulmoi hapur të gjithë. Nga ish-aleati Edi Rama, te miliarderi George Soros, SHBA, BE e deri te bashkëshortja e tij Monika Kryemadhi, për të cilën tha se i dogji mandatet e LSI që ai i kishte fituar me gjak.
Mic Sokoli, Vojo Kushi dhe Mujo Ulqinaku ishin 3 “Dëshmorë të Atdheut” që Meta përmendi për të treguar se ai dhe çdo shqiptar që i ka mbetur një pikë gjaku në vena do të sakrifikohen për Shqipërinë, për ta çliruar nga grupi i strukturuar PPP-d, Edi Rama, miliarderët dhe SOROS-i.
2- (Mic Sokoli – djal i Tropojës dhe luftëtar i Lidhjes Shqiptare të Prizrenit, në prill të 1881 gjatë betejës me trupat osmane të komanduara nga Dervish Pasha në Slivovë, vdiq duke i vënë gjoksin topit.
Vojo Kushi – komandanti shkodran i njësive guerile në mbarë Shqipërinë më 7 tetor 1942 u ndoq derisa u rrethua te Kodra e Kuqe në Tiranë, ku u vra në sulm mbi autoblind.
Mujo Ulqinaku – oficer shqiptar i Ushtrisë Mbretërore Shqiptare, i njohur për rezistencën e tij i vetëm më 7 prill 1939 ndaj forcave italiane gjatë pushtimit të Durrësit, ku ra dëshmor)
Në valën e alegorive historike duke premtuar se do t’i “dalë për zot Shqipërisë” duke e mbrojtur nga ky komplot i udhëhequr nga Edi Rama, Meta e krahasoi veten edhe me ‘rebelin’ Avni Rustemi – i njohur për vrasjen në atentat në Paris të Esat Toptanit në vitin 1920 para se të ekzekutohej në një atentat në Tiranë në vitin 1924.
Dhe i fundit por jo më pak i rëndësishmi që përmendi Ilir Meta, politikani i cili thotë se pa dëshirë por me sakrifikim pranoi ofertën e Edi Ramës për t’u bërë President i Shqipërisë në mënyrë që të futej në Europë, ishte politikani i shquar britanik Winston Churchill.
3- (Sir Winston Churchill – është një politikan britanik, oficer ushtrie dhe shkrimtar. Ai ishte Kryeministër i Mbretërisë së Bashkuar nga viti 1940 deri më 1945, kur udhëhoqi Britaninë në fitoren e Luftës së Dytë Botërore dhe përsëri nga viti 1951 deri më 1955. Ai e braktisi Parlamentin nga 1922 deri në 1924 kur u rikthye sërish, duke i kaluar këto dy vite si shkrimtar në Villa Rêve d’Or pranë Kanës)
Atë Meta e përmendi kur lexoi mesazhin që Edi Rama i kishte dërguar në 18 shkurt, ku i thoshte: “Në fund të mandatit si President s’do gjesh më këmbë LSI-je”.
Si për t’iu përgjigjur kërcënimit në distancë, Presidenti riktheu në kujtesë historinë e karrierës së Churchill, i cili për dy vite e braktisi politikën për romanet dhe u rikthye sërish për t’u bërë “Kancelari i Thesarit”.
“Ai ta dijë mirë se unë LSI e bëj në çdo moment 3, 4 herë më të madhe se sa ai”, ishte mesazhi i Metës, si për të treguar se mund të rikthehet shumë më i fortë në jetën politike edhe pas një disfate.(G.Shqip)/l.m
