Kina përdori një sërë teknologjish të reja për të garantuar që anija kozmike me ekuipazh “Shenzhou-14” të kthehej e sigurt në Tokë të hënën.
Ndryshe nga misioni i mëparshëm, kthimi i anijes kozmike “Shenzhou-14” ishte planifikuar të bëhej natën, që do të thotë temperatura të ulëta dhe dukshmëri e ulët.
Sistemi i kontrollit termik i anijes kozmike nuk kishte pajisje që kërkonin përdorimin e energjisë. Ajo ishte gjithashtu e pajisur me radiatorë dhe ngrohëse që prodhonin energji për ta mbajtur brendësinë e anijes kozmike të ngrohtë.
“Në qoftë se kapsula e rikthimit do të zbriste në një shkretëtirë me një temperaturë nën minus 25 gradë Celsius,” tha Peng Huakang, mbikqyrës teknik i ekipit të tërheqjes së kapsulës së kthimit në Grupin e Shkencës dhe Teknologjisë Hapësinore të Akademisë së Pestë, “temperatura brenda mund të mbahej në 15 gradë Celsius për më shumë se një orë, me kapakun dhe ventilatorin të mbyllur.”
Lidhur me komunikimin, ekipet në Tokë, duke përfshirë qendrën e kontrollit në Pekin, vendin e zbritjes dhe ekipet e shpëtimit, përdorën Sistemin e Navigimit Satelitor “Beidou” për të komunikuar me njëri-tjetrin në kohë reale, për të rritur efektshmërinë e gjetjes së kapsulës së rikthimit.
Helikopterët e shpëtimit kishin gjithashtu një sistem inteligjent të instaluar për të ndihmuar parashikimin e rrugës së kapsulës së kthimit gjatë uljes.
Ndërkohë, kur anija kozmike ishte 10 kilometra mbi tokë, tre parashutat e saj u hapën njëra pas tjetrës. Parashutat u zgjeruan nga vetëm disa metra katrorë në mbi 1 000 metra katrorë, duke ulur gradualisht shpejtësinë e anijes kozmike nga 200 në 7 metra në sekondë, gjë që i mbrojti astronautët nga forca e tepërt e rëndesës.
/e.d
