Si i humbi katër milion euro KQZ-ja
Kanë pushuar hetimet edhe për një ndër shumë episodet ku xhepat e shqiptarëve kanë humbur para. Madje jo pak. Sipas mediave, prokuroria ka pushuar hetimet, pas rreth dy vitesh, për dy projekte të tenderuara nga Komisioni Qëndror i Zgjedhjeve. Fjala është përnumërimin elektronik të votave në Fier dhe sistemin e identifikimit elektronik të votuesve në Tiranë. Që të dyaj u shpallën në vitin 2013 si projekte që do të revolucionarizonin sistemin zgjedhor në Shqipëri, duke pakësuar në mënyrë drastike mundësitë për vjedhje e manipulime. Kurse sot, megjithëse hetimet treguan se kompania fituese e tenderit i ka marrë paratë, ne kemi katër milion më pak në arkat e shtetit, por asnjë rezultat konkret.
Sipas hetimeve, KQZ nënshkroi dy kontrata me një kompani spanjolle, por projektet në Fier dhe Tiranë dështuan në 17 maj dhe 8 qershor 2013. Kjo sepse kompania spanjolle ju referua listës zgjedhore të vitit 2011, e cia kishte 42 parti në fletën e votimit, ndërkohë që në zgjedhjet e 2013 u regjistruan 66 parti. Në këto kushte sistemi kompjuterik e kishte të pamundur të lexonte shifrat konkrete nëpër lista. Nga ana tjetër, sistemi nuk lexonte dot votimet e dyfishta të personave me të njëjtën kartë identiteti. Projektet dështuan, por jo marrja e parave. Dhe sot kemi katër milion euro të humbura dhe asnjë fajtor. Histori e vjetër dhe e dëgjuar shumë herë.
