Detaje të reja dalin nga vrasja e dyfishtë e Kol Murranit dhe Preng Simonit në Lezhë, një ditë më parë. Sipas mediave informative, në vendngjarje nuk janë gjetur gëzhoja, dhe dyshohet se autori mund t’i ketë mbledhur, për të fshehur provat.
Ndërkaq, 30 persona janë marrë në pyetje nga policia, kryesisht të afërm të viktimave. Ngjarja e rëndë ndodhi në fshatin Lalm i Vjetër, në Lezhë.
Ekzekutimi i tyre dyshohet se ka ndodhur gjatë mesditës. Momentalisht policia ka të dyshuar si autor të vrasjes një person që është banor i zonës.
Dyshohet se ngjarja e rëndë ka ndodhur për shkak të konflikteve të vjetra mes palëve, ndërsa nga të dhënat e para të policisë objektivi i atentatit duket të ketë qenë Kol Murrani.
Viktimat kishin shkuar në fshat për të parë shtëpitë e vjetra me një motor. Sipas burimeve, ata janë qëlluar me breshëri automatiku, dhe nga plagët e marra në disa pjesë të trupit kanë gjetur vdekjen e menjëhershme.
Njëri prej viktimave, Kol Murrani është një rapsod i njohur. Ndërkohë ende mbeten mister shkaqet e kësaj ngjarje të rëndë. /e.s/
