Analizat paraprake vërtetojnë se në shishen e vogël nga e cila piu i dënuari për krime lufte, Sllobodan Praljak, në Gjykatën e Hagës, kishte një substancë kimike (kimikate) vdekjeprurëse, thanë prokurorët holandezë.
Ata kanë deklaruar po ashtu se së shpejti do të kryhet edhe autopsia.
Pralak tronditi Tribunalin Penal Ndërkombëtar për ish-Jugosllavinë (ICTY), kur më 29 nëntor piu një lëng (helm) nga një shishe e vogël pak çaste pasi Gjykata e Apelit i konfirmoi atij dënimin prej 20 vjet burgim.
Ai vdiq në spital pasi u nxor nga gjykata. Autoritetet holandeze po hetojnë tani shkeljet e dukshme të sigurisë të cilat e lejuan Praljak të helmonte veten. ICTY tha vetëm se ai kishte pirë “një lëng” dhe u sëmur shpejt.
Avokati kroat Goran Mikuličić i tha bashkëpunëtorit lokal N1 të CNN se “kushdo mund t’i kishte sjellë me lehtësi një shishe helmi”. Ai tha se familja, miqtë, gazetarët dhe avokatët lejoheshin të vizitonin Praljakun, por vetëm avokatët lejoheshin të merrnin çanta në objektin e paraburgimit.
Praljak ishte dënuar fillimisht në vitin 2013 për krime lufte në Mostar dhe ishte personi që dha urdhër për hedhjen në erë të urës së famshme të Mostarit. Gjykata e Hagës ka konfirmuar të mërkurën dënimin për Praljak dhe pesë kroatë të tjerë të Bosnjës.
Javën e kaluar, Gjykata e Hagës ka dënuar me burgim të përjetshëm Ratko Mlladic – ish-komandant i forcave serbe të Bosnjës. Kjo gjykatë do t’i mbyllë dyert në fund të këtij viti. /b.d
