Ibrahim Basha, efektivi i RENEA-s i vrarë në Lazarat dhe që u shpall tashmë dëshmor i atdheut, dhe kapiten Feti Vogli, po dëshmor i atdheut, duket se kanë qenë miq. Ndoshta misionet paqeruajtëse të Shqipërisë në Afganistan kishin bërë që ata të njihen me njëri-tjetrin.
Ibrahim Basha njihej me kapiten Feti Voglin, i cili ra dëshmor disa vite më parë në vendin e largët.
Basha më 20 shkurt 2014 komentonte një status përkujtimor të marinsit amerikan Brandon Holifield në Facebook kushtuar pikërisht Feti Voglit.
Në të Holifield shkruante: “Të mendoj çdo ditë shok. Deri sa të takohemi sërish atje ku bari është më i gjelbër miku im”.
I ndjeri Ibrahim Basha reagonte ndaj këtij homazhi, duke shkruar në anglisht në Facebook-un e amerikanit: “Ai do të jetë dhe do të mbetet gjithnjë në mendjen tonë…”.
Fati i zi e deshi që dëshmori Basha t’i bashkohet përpara kohe mikut dhe kolegut të tij dëshmor Feti Vogli.
