Gjermania u ka dhënë një goditje të fortë Presidenti Bujar Nishani, Visho Ajazit dhe Adriatik Llallës. Raporti i Fondacionit gjerman Bertelsman për vitin 2016 i cilëson si mjaft problematikë dhe se kanë shpërdoruar pozicionet në të cilat janë zgjedhur. Indeksi i transformimit i Fondacionit Bertelsman është një instrument i besueshëm dhe i vlerësuar në të gjithë botën, i cili vlerëson statusin e demokracisë, ekonomisë dhe menaxhimit politik në 129 ekonomi në të gjithë botën. Konkretisht, për Presidentin Nishani, raporti thotë se ai vijoi të ndjekë të njëjtën linjë politike me PD-në edhe pas zgjedhjes si kreu i shtetit. Konstatohet gjithashtu se Nishani është përplasur disa herë me mazhorancën aktuale duke i kthyer disa ligje për rishqyrtim.
“Zgjedhja e Bujar Nishanit, nga rrethet e brendshme të PD, si President i vendit ishte një goditje madhore që Presidenca të mbetej një nga institucionet e pavarura të vendit. Pas ardhjes në zyrë, Presidenti i ri ndoqi linjën politike të ish-mazhorancës duke zëvendësuar shumë liderë të institucioneve kushtetuese”, thuhet në raportin e Fondacionit Bertelsman, i bërë publik nga “SOT”. “Profili politik i Presidentit krijoi një marrëdhënie të vështirë me mazhorancën e re. Ai ka përdorur veton kundër iniciativave ligjore, duke përfshirë dhe reformën e rëndësishme Administrative Territoriale, të nisur nga mazhoranca. Pozitat e Presidentit duket se janë në linjë me familjen politike që e solli në post, duke penguar çdo pretendim për një rol “të pavarur” si simbol i unitetit kombëtar të vendit”, thuhet më tej në raport.
Raporti për Visho Likën
Nuk mungojnë as akuzat për kreun e Shërbimit Informativ Shtetëror, Visho Lika, i cili mban këtë detyrë si i zgjedhur nga Partia Demokratike. Konstatohet se Lika ka përgjuar persona të ndryshëm dhe më pas këto përgjime i ka përdorur për shantazhe. Po ashtu, ai është akuzuar edhe për përgjime ndaj Edi Ramës dhe Ilir Metës. “Kreu i shërbimeve informative shtetërore u zëvendësua shpejt nga Visho Ajazi, një tjetër anëtar përfaqësues i PD dhe mjaft i kontestuar në shërbimet sekrete gjatë viteve të trazirave 1997. Një raport parlamentar në vitin 2014 tregonte se pak pas emërimit të Visho Ajazi Likës, shërbimet e sigurisë kanë përgjuar një listë personash të ndryshëm dhe më pas përgjimet janë përdorur për presione dhe shantazhe”, thekson raporti i fondacionit gjerman. Në fakt kreu i SHISH-it vazhdimisht është akuzuar edhe nga mazhoranca që qeveris aktualisht vendin se jep informacione në mënyrë të vazhdueshme tek ish-kryeministri Sali Berisha duke mos i ndërprerë raportet me të.
Dosjet e korrupsionit në gjyqësor
Raporti i fondacionit gjerman nxjerr në pah edhe disa kritika të cilat lidhen me korrupsionin në sistemin gjyqësor, që vazhdimisht ka qenë një problem shqetësues për të gjithë institucionet ndërkombëtare. Theksohet gjithashtu edhe roli i kryeprokurorit Adriatik Llalla për të cilin thuhet se ka mbyllur dosjet e korrupsionit. “Duke parë lidhjen e ngushtë mes politikës e strukturave gjyqësore, zyrtarët që thyejnë ligjin rrallëherë hetohen dhe thuajse asnjëherë nuk dënohen. Shqipëria ka një ecuri shumë negative në hetimet për abuzimet me detyrën, veçanërisht kur është fjala për politikanët e lartë. Dështimi i gjyqësorit në dhënien e drejtësisë u demonstrua në proceset e politikanëve të lartë për abuzime me detyrën. Në një prej rasteve më të kontestuara, atë të vrasjeve të 21 janarit nga Garda e Republikës, gjyqësori raportohet të ketë injoruar prova të sjella nga FBI”, thuhet në raport.
Sot/d.i.
