Luftëtari dhe Partizani e kanë mbyllur në barazimin 1-1 ndeshjen e zhvilluar në Gjirokastër. Sfida ishte mjaft e luftuar me të dy skuadrat që kërkuan të merrnin maksimumin, por golat e Malës dhe Ymerajt bënë që të dy ekipet të ndajnë nga 1 pikë.
45 minutat e para të luajtura në stadiumin e Gjirokastrës ishin të një niveli mesatar. Ekipi i Luftëtarit ishte më kërkues dhe kishte epërsi në fushën e lojës. Bluzinjtë sulmuan më shumë se të kuqtë me Shkurtajn dhe Rrocën që ishin një rrezik konstant.
Nga krahu tjetër, trajneri Skënder Gega vendosi një ekip të mirëpozicionuar në fushën e lojës. Të kuqtë qëndruan në ekuilibër dhe rritën presionin me kalimin e minutave. Momenti vendimtar i takimit erdhi në minutën e 36′. Bardhi bën gjithçka mirë dhe vertikalizon mjaft bukur për Malën.
Shtatshkurtri shfaqet shumë i qetë në zonë dhe me finte nxjerr zbuluar një nga mbrojtësit e gjirokastritëve. I vetëm përballë Ruçit gjuan dhe e dërgon në kuadrat për 0-1.
Pjesa e dytë solli një Luftëtar më të rrezikshëm dhe më kërkues. Vendasit gjetën shpejt golin e barazimit me anë të Ymerajt në minutën e 55′. Lojtari i Luftëtarit kaloi me lehtësi mbrojtjen e “demave” dhe pushoi topin në rrjetë për 1-1.
Një moment paniku përfshiu të gjithë tifozët e pranishëm në stadiumin e Gjirokastrës që nxorën rezultatin në plan të dytë në minutën e 60′. Një përplasje ndërmjet portierit të Partizanit, Alban Hoxha dhe sulmuesit të Luftëtarit, Maldin Ymeraj ka krijuar panik.
Të dy sportistët mbeten të dëmtuar me stafet teknike që ndërhynë me shpejtësi. Hoxha doli me krahun e fashuar, ndërsa sulmuesi vazhdoi lojën. Në këtë moment ka patur dhe një problem për kapitenin e Luftëtarit, Ramadani. Ky i fundit u largua me ambulancë nga stadiumi.
Pas këtij episodi, loja u zbeh dhe të dy skuadrat kaluan në nervozizë. Lojtarët e humbën gjakftohtësinë dhe nuk arritën të rrezikonin portat respektive. Në fund të takimit, në minutën e 7′ shtesë, Donald Rrapo humbet një rast flagrant përpara portës së Xhikës. Një barazim i merituar për të dy ekipet. Me këtë pikë, Partizani vazhdon kryesimin, por distanca ngushtohet me 3 pikë larg Kukësit. Luftëtari ndodhet në vendin e 7 me 17 pikë, po aq sa Tirana e vendit të 6.
Luftëtari-Partizani 1-1
Shënues: Ymeraj 55′ / Mala 36′
Luftëtari: Ruçi, Demo, Hoxha, Rapa, Xhekson, Ramadani (Açka 60′), Aleksi, Rroca, Ymeraj (Dunga 85′), Milosavljev (Rapo 49′), Shkurtaj. Trajner: Gentian Mezani
Partizani: Hoxha, Ibrahimi, Belica, Atanda (Bitri 59′), Trashi, Hila, Kote, Mensah (Hebaj 55′), Asani, Mala, Bardhi. Trajner: Skënder Gega
Gjyqtarë: Juxhin Xhaja, Denis Rexha, Astrit Mahmuti, Olsid Ferataj
(Telesport / a.r)
