Ylli i kinemasë nga Zelanda e Re, Sam Neill, është ndarë nga jeta në moshën 78-vjeçare.
Njoftimi erdhi nga familjarët e tij, të cilët dhanë lajmin përmes një komunikate të shpërndarë në profilin zyrtar të aktorit në Instagram.
Ende nuk është bërë i ditur shkaku i vdekjes, por duhet theksuar se Neill kishte treguar publikisht se kishte triumfuar mbi një sëmundje të rëndë. Në vitin 2022, atij i ishte diagnostikuar limfoma angioimunoblastike e qelizave T në stadin e tretë, një lloj i rrallë i kancerit të gjakut.
Sipas njoftimit të familjes, aktori dha frymën e fundit në Sidnei të Australisë, me të dashurit e tij pranë.
“Me pikëllim të thellë, familja e Sam Neill njofton ndarjen e tij nga jeta. Sami iku i rrethuar nga familja, me të njëjtin dinjitet që e përcolli gjatë gjithë jetës. Humbja erdhi në mënyrë të papritur, por ndihemi me fat që ai ishte i lirë nga kanceri. I jemi mirënjohës ekipit të Spitalit Privat Shën Vincent për përkujdesjen e tyre të shkëlqyer dhe lusim që privatësia jonë të respektohet në këto çaste të vështira,” shprehet deklarata.
Pas përhapjes së lajmit, homazhe për aktorin shprehu edhe kryeministri i Australisë, Anthony Albanese, i cili vlerësoi lart rolin e tij në kinemanë vendase dhe atë botërore.
“Sam Neill ishte pjesë e shumë historive të dashura australiane dhe zuri një vend të veçantë në shpirtrat tanë. Sëmundjen e përballoi me dinjitet, humor e forcë. Do të na mungojë pa masë dhe do të mbahet mend përjetë. U prehtë në paqe!”, shkroi Albanese.
I lindur më 1947 në qytetin Omagh të Irlandës së Veriut dhe i rritur në Zelandën e Re, Sam Neill arriti famën globale me portretizimin e Dr. Alan Grant në filmin ikonik “Jurassic Park” të Steven Spielberg. Karriera e tij përfshin edhe interpretime të paharrueshme në filma si “The Piano”, “The Hunt for Red October”, “Event Horizon”, “The Hunt for the Wilderpeople”, si dhe në seriale të njohur si “The Tudors” dhe “Peaky Blinders”.
Në një rrugëtim artistik që përshkoi më shumë se gjysmë shekulli, Neill mori pjesë në mbi 150 filma dhe prodhime televizive, duke u bërë një figurë emblematike e kinematografisë ndërkombëtare. Për kontributin e tij në art, ai mori titullin fisnik “Sir” në Zelandën e Re.
Aktori la pas katër fëmijë dhe gjashtë nipër e mbesa.
