Kreu i grupit parlamentar të PS, Taulant Balla ka folur pas përfundimit të seancës së fundit të Kuvendit për këtë sesion, ku projekt ligji për magjistratët është shtyrë për në shtator, pasi nevojiten 84 vota.
“Me gjithë përpjekjen tonë dhe dakordësinë lidhur me propozimin që bëri Luan Rama për të pasur një dialog në lidhje me rindryshimin e afatit sa i përket pr.ligjit të magjistraturës, dua të them se kemi pasur një komunikim me opozitën. Nuk e kuptojmë bojkotin e opozitës në votim. Nuk jemi vënë në dijeni për 7 pikat e PD”- tha Taulant Balla.
Teksa u pyet për faktin nëse maxhoranca do të pranojë 7 pikat që përmendi kreu i PD-së Lulzim Basha për konsensus mes palëve, Balla tha se deputetët e opozitës e kishin bërë të qartë se nuk do të merrnin pjesë nëse nuk rishikohej ligji për teatrin.
“Unë kam qenë në detyrë në sallën e Kuvendit dhe kam dëgjuar fjalën e deputetëve atje. Kemi pasur komunikim institucional me opozitën, me LSI dhe PD. Dhe përsa i përket votimit të sotëm na është thënë se pa u kthyer ligji i teatrit, ata s’do të merrnin pjesë. Unë nuk shoh një lidhje mes këtyre të dyjave, mes shkollës së Magjistraturës dhe ndërprerjes së karrierës për nxënësit ekselentë. Prej ditës së parë, prej shtatorit të 2017-ës kemi shprehur gatishmërinë tonë për dialog. Opozitës i them sot zyrtarisht që jemi vonë, por jo shumë vonë për të përmbushur afatet”, tha Balla.
ma.me
