Avokati Maks Haxhia, mbrojtësi i ish-ministrit të Brendshëm Saimir Tahiri ka reaguar në lidhje me procesin gjyqësor i cili u shty për në datën 24 qershor pas një seance 6 orësh këtë të enjte.
Sipas avokatit Maks Haxhia, procesi për të implikuar Saimir Tahirin në këtë histori, është një sajesë për ta larguar nga skena politike, pasi posti i ministrit është politik, dhe si i tillë nuk merr ngarkesa personale, për shkak të politikës që ndjek organi kolegjial, në këtë rast qeveria.
“Ishte një njollë, një sajesë për të implikuar dhe larguar nga skena politike z. Tahiri. Kuptohet nga gjithkush që nuk mund të marrë përgjegjësi penale Ministri sepse u kanabizua vendi. Funksioni i Ministrit të Brendshëm është një entitet politik, nuk është entitet me detyrë të përcaktuar, siç është policia e shtetit.”-thotë ai për Abc News.
Haxhia theksoi se për rastin e Tahirit duhen dalluar përgjegjësitë politike, dhe përgjegjësitë penale pasi kjo e fundit, duhet të ketë rrethana konkrete, dhe emra konkretë me veprime konkrete.
“Nëse flasim për përgjegjësi penale duhet folur për persona konkret, me veprime konkrete” u shpreh mbrojtësi i ish-ministrit të brendshëm.
/a.r
