Maxhoranca ka vendosur të shtyjë afatin për investimet strategjike deri në 31 dhjetor të vitit 2026 nga fundi i këtij viti që ishte limiti. Propozimi i bërë nga deputetja Pranvera Resulaj u miratua në Komisionin e Veprimtarive. Kjo nismë është marrë si pasojë e interesit të subjekteve për këtë paketë ligjore.
Deputetja Resulaj, në një intervistë për “Money Report”, tha se një lëvizje e tillë vjen për shkak të mungesës së një ligji të integruar, për investimet direkte të huaja dhe ato strategjike.
“Vjen se nuk kemi ende një ligj të integruar të investimeve të huaja direkte dhe strategjike kështu që deri në përcaktimin e plotë të një ligji të tillë dhe të mbulojë dhe të mos kemi hapësirë ligjore boshe për të gjithë projektet që janë në proces.”, u shpreh ajo.
Deri më tani investimet strategjike realizoheshin në sektorë prioritar si energjia, transporti apo turizmi por me propozimin e ri, mund të shtrihen edhe në sektorë të tjerë me kusht që vlera e investimet të jetë 50 milionë euro ose më shumë.
Sipas deputetes, fokusi do të jetë te sektorët që sjellin më shumë të ardhura.
“Shtyrja do të çojë drejt një ligji të integruar. Në momentin që do ta kemi, rekomandim dhe i BE në kuadër të planit të rritjes, por është me interes të themi që këto sektorë që janë më prioritar janë zhvillimi dhe ka pasur interes. Është vënë re që ka interes edhe për sektorë të tjerë që nuk janë te 6 sektorët e ligjit aktual. Për këtë është futur një procedurë e asistuar që konsideron kërkesat për sektorë të tjerë jashtë kësaj liste. Mund të jetë një sektor në shëndetësi, një nga shembujt që u dha edhe gjatë prezantimit, si Lidl, një kompani për rrjetin ushqimor që nuk hyn te këto sektorë por është potencial i madh dhe me interes për konsumatorin.
Ligj i integruar në sensin që bashkon ligjin aktual për investimet e huaja direkte dhe për atë të investimeve strategjike. Pra nuk do të ketë dy ligje të veçanta. Për shkak të pamundësisë për të mbërritur te një ligj i integruar, u shty ky afat. Me planin e rritjes është parashikuar që në 2027 të mos kemi statuse të veçanta, por një ligj që përmbledh atë të investimeve të huaj direkte dhe strategjike.”, u shpreh deputetja.
