Prokuroria përfundoi hetimin për aksidentin e rëndë ku gjeti vdekjen nëna e dy fëmijëve, Dhurata Prifti, në korrik 2016, pranë Stacionit të Trenit, në Tiranë.
Organi i Akuzës, pas kryerjes së hetimeve, dërgoi për gjykim dosjen në ngarkim të 20-vjeçarit Andrea Memollari, drejtuesi i mjetit nga i cili u përplas për vdekje një grua, nënë e dy fëmijëve. Aksidenti tragjik për autorësinë e të cilit akuzohet i riu, ndodhi në 13 korrik në kryqëzimin e rrugës “Jordan Misja” me Unazën, i njohur si kryqëzimi i burgut. Në ngjarje humbi jetën 45-vjeçarja Dhurata Prifti, sportiste e njohur e qitjes, e cila në momentin e aksidentit po kalonte nga një krah i rrugës në tjetrin bashkë me dy fëmijët e mitur.
Sipas Prokurorisë, i pandehuri Memollari do të përballet me drejtësinë si i akuzuar për dy vepra penale, atë të “shkeljes së rregullave të qarkullimit rrugor” dhe “largim nga vendi i aksidentit”. Dosja në ngarkim të tij është regjistruar me numrin 4200 në Gjykatën e Tiranës, ku pritet të shqyrtohet nga një trup gjykues i kryesuar nga gjyqtari Gerd Hoxha.
AKSIDENTI
Gjatë hetimit në lidhje me këtë çështje, sipas Prokurorisë, tre janë elementet e fajësisë së shtetasit Andrea Memollari. Elementi i parë është se ai ka qenë me shpejtësi tej normave për aksin rrugor ku ndodhej dhe kushtet e trafikut në të cilat po lëvizte. Elementi i dytë është mungesa e reagimit, pra fakti se drejtuesi i mjetit që shkaktoi aksidentin nuk ka frenuar, por i ka dhënë më shumë gaz automjetit dhe ka kaluar mbi trupin e viktimës, pasi e kishte rrëzuar atë, duke rënduar tragjikisht pasojat e ngjarjes. Elementi i tretë fajësues, sipas Prokurorisë, është fakti se drejtuesi i makinës ka ikur nga vendi i ngjarjes, duke mos i dhënë ndihmën e parë të dëmtuarës dhe duke iu shmangur Policisë dhe drejtësisë.
AUTORI
I pandehuri Memollari, përsëritës në kryerjen e një vepre penale, u ndalua vetëm pak orë pas aksidentit të korrikut, aksident që tronditi opinionin publik. Kjo edhe prej faktit se një kamera sigurie e një biznesi regjistroi momentin kur e ndjera Prifti përplasej nga automjeti, që lëvizte me shpejtësi të madhe dhe vijonte lëvizjen duke e shkelur. Sipas Prokurorisë, pas momentit të përplasjes, i dyshuari Memollari nuk ka frenuar, çka mund të kishte shmangur pasojën fatale. Veprimi i tij i ka shkaktuar dëmtime të rënda trupit të nënës së dy fëmijëve, e cila ndërroi jetë pas dërgimit të saj në spital. Gjatë seancës gjyqësore të caktimit të masës së sigurisë “arrest në burg” ndaj Memollarit, zhvilluar në 16 korrik në Gjykatën e Tiranës, 20-vjeçari u shfaq i penduar dhe kërkoi ndjesë për ngjarjen. “Nuk desha të ndodhte kjo. Më zuri paniku në atë moment. Nuk di se çfarë bëra”, deklaroi i akuzuari në atë seancë. Panorama/a.k
