Burak Urtyk është 26-vjeçari turk i cili, në përmbushje të kushtit të pestë të Islamit, sipas të cilit çdo besimtar duhet të shkojë të paktën një herë në pelegrinazhin e Mekës, ka nisur ta përmbushë këtë obligim duke udhëtuar me biçikletë nga Shtutgarti i Gjermanisë deri në Mekë.
Një distancë prej 6 mijë kilometrash që 26-vjeçari shpreson ta përshkojë me ndihmën dhe besimin në Zot.
Por, përveç destinacionit, Burak gjatë rrugës viziton edhe shumë vende të tjera, dhe një prej tyre që e pëlqen dhe i ka lënë mbresa është qyteti i Prizrenit, ku ai nuk e fsheh të shprehet se ndihet si në shtëpinë e tij.
“Jam shumë i lumtur që gjendem këtu, kam qenë edhe para dy vitesh dhe mund të them që është një ndër më të bukurit në Europë. Kur vij në Prizren ndihem si në shtëpinë time”, thotë ai.
Sa i takon udhëtimit të pazakontë, ai shprehet se i pëlqen të bëjë udhëtime të tilla dhe se ky drejt Mekës, pavarësisht kilometrave, është ndër më të veçantët që ka ndërmarrë ndonjëherë.
“Udhëtimi im ka fillua nga Shtutgarti. Vendosa të shkoj në Mekë pasi është destinacioni më i mirë për një mysliman në këtë botë”.
Pas vizitës në Prizren, Buraku përshëndet në shqip për të vijuar rrugëtimin e tij.
