Me fillimin e muajit gusht ka nisur të rritet edhe fluksi i udhëtarëve në hyrje dhe dalje në pikat kufitare të qarkut të Korçës.
Në pikën e kalimit kufitar të Kapshticës, autoritetet kufitare po alternojnë sportelet në varësi të fluksit, për t’u shërbyer sa më mirë qytetarëve si në hyrje, ashtu edhe në dalje.
Gjatë 24 orëve të fundit, në Kapshticë janë regjistruar 5.252 hyrje të shtetasve shqiptarë dhe të huaj, ndërsa 4.658 persona kanë dalë nga Shqipëria drejt Greqisë.
Sipas autoriteteve kufitare, fluksi aktual mbetet i përballueshëm dhe po menaxhohet pa probleme nga pala shqiptare dhe ajo greke. Megjithatë, në ditët në vijim pritet një rritje edhe më e madhe e lëvizjeve.
Fluksi i lartë lidhet kryesisht me emigrantët që kthehen nga vendet ku jetojnë dhe punojnë për të kaluar pushimet në Shqipëri, por edhe me qytetarët që zgjedhin të kalojnë disa ditë pushimesh në Greqi.
Fluks i shtuar udhëtarësh dhe mjetesh është regjistruar edhe në pikën e kalimit kufitar të Qafë Thanës. Gjatë 24 orëve të fundit, në këtë pikë kanë hyrë në vendin tonë 5.321 shtetas, ndërsa 4.799 të tjerë kanë dalë drejt Maqedonisë së Veriut.
Gjatë katër ditëve të para të muajit gusht, në Kapshticë janë përpunuar 37.781 shtetas në hyrje dhe dalje. Ndërkohë, në të njëjtën periudhë, në Qafë Thanë burimet zyrtare raportojnë 42.219 shtetas që kanë hyrë dhe kanë dalë nga kjo pikë e kalimit kufitar.
