Më pak kursime sepse përfitimi është minimal nëse lekët mbyllen në bankë si ‘depozitë’. Banka e Shqipërisë thotë se ritmi i depozitave është ulur gjatë fundit të vitit 2024, për shkak të rënies së normave të interesit, e shkaktuar nga ulja e normës bazë të interesit nga Banka e Shqipërisë gjatë vitit të shkuar, si vendim për t’ju përgjigjur tkurrjes së inflacionit.
Vlera e depozitave nga qytetarët dhe bizneset deri në fund të vitit 2024 arriti në 13.6 miliardë euro, afro 570 milionë euro më shumë se në vitin 2023, por përfitimi i qytetarëve nga këto kursime është në rënie për shkak të uljes së interesave.
“Interesi mesatar i depozitave në Lek rezultoi 1.9%, nga 2.0% dhe 2.2% që ishte përkatësisht në tremujorin e tretë dhe të dytë të vitit. Në mënyrë të ngjashme, interesi mesatar për depozitat në Euro ka rënë në 1.1% në tremujorin e katërt, nga mesatarisht 1.4% që ishte në dy tremujorët paraardhës.”, thotë Banka e Shqipërisë.
Për këtë arsye qytetarët i kanë zhvendosur kursimet e tyre në ‘depozita pa afat’ që mund t’i tërheqin në çdo kohë, pasi përfitimi nga interesi i ulët është minimal.
“Struktura kohore e depozitave është zhvendosur drejt depozitave pa afat, të cilat përbëjnë rreth 55.7% të totalit. Kjo ecuri reflekton uljen e normave të kthimit nga depozitat si në Lek edhe në Euro, duke rikthyer tendencën për vendosjen e tyre në depozita shumë likuide”, thuhet në raportin e politikës monetare.
Aktualisht në banka janë 6.2 miliardë euro kursime në monedhën kombëtare dhe rreth 7.3 miliardë euro depozita në valutë.
Fitimi i ulët nga mbyllja e parave nëpër bankave është edhe një nga shkaqet kryesore sipas Ministrisë së Financave që shton përdorimin e parasë cash në ekonomi.
DEPOZITAT NË SHQIPËRI
Viti 2023 13,053 mln euro
Viti 2024 13,622 mln euro
Rritja +569 mln euro
