Afro 10% e bebeve lindin para kohe në Shqipëri. Nga afro 27 mijë lindje të regjistruara në vitin 2023, 2700 janë bebe të lindura prematurë, lindje përpara javës së 37 të shtatzënisë, ku organet e bebit nuk janë formësuar siç duhet.
Mjekët obestetër gjinekologë thonë se vitet e fundit vihet re një rritje e lindjeve të tilla tek nënat e reja në Shqipëri.
“Statistikat në Shqipëri tregojnë në të njëjta nivele me ato në vendet e zhvilluara dhe në zhvillim, diku tek 10% i lindjeve”, tha Dritan Deçka, obstetër-gjinekolog.
Një nga faktorët e rritjes së numrit të bebeve premtaurë, është mosha e madhe e nënës për lindjen e parë apo edhe sëmundje kronike që nëna mund të mbartë.
“Janë shumë arsye që ndikojnë. Me rritjen e moshës së nënave, për shtatzëninë e parë rritet edhe niveli i prematuritetit”, tha Deçka.
Mjekët thonë se rreziqet për bebet prematurë janë të shumta, por falë zhvillimit teknologjik shumë prej tyre arrijnë t’ja dalin.
“Lindjet e parakohshme ndikojnë në sëmundshmërinë dhe mobilitetin e bebit. Pasi një beb i lindur para kohe rrezikon të mos ia dalë të mbijetojë, rrezikojnë edhe një numër sëmundjesh që përfshin sëmundjet respiratore, nga moszhvillimi, duke përfshirë edhe sëmundjet që lidhen me shikimin dhe dëgjimin”, tha mjeku.
Në rang global, çdo vit lindin para kohe rreth 15 milionë foshnja.
