Pavarësisht se ka vetëm tre katër ditë që ka nisur fushata elektorale për zgjedhjet e pjesshme për pushtetin vendor në bashkinë e Dibrës, situata nuk është aq e qetë në kampin e djathtë.
Strategjia e forcës brenda partisë dhe e diktatit kërcënues ndaj bazës, që e shfaqi i deleguari në këtë qark për të ndihmuar në fushatë kandidatin Shehu, vetë nënkryetari i PD njëherësh dhe kryetar i grupit parlamentar të kësaj partie Edi Paloka ka sjellë dhe distancimet e para.
I pari që u distancua publikisht nga fushata në mbështetje të Shehut ka qënë ish-kreu i PD Dibër Rrahim Kaleci.
I cili ndonëse deklaroi se vota e tij dhe e familjes së tij do të jetë për kandidatin e PD, ai ka treguar përmes deklarave se nuk ia fal akuzën e bërë nga mediat afër PD se ka marrë nga kundërshtarët politikë 200 mijë euro, akuzë të cilën e ka hedhur poshtë, dhe nga ana tjetër Kaleci është shprehur se nuk do bëjë fushatë për Shehun.
Pjesa e padukshme e drejtuesve të PD në këtë bashki dhe qark tregon se ata nuk do të mbështesin kandidatin e PD Sherefedin Shehu për postin e kryetarit të bashkisë së Dibrës.
Por refuzimi i ish-deputetit dhe ish-kryetarit të PD Rrahim Kaleci ka treguar se ai dhe strukturat lokale nuk janë dakort me kandidaturën e Sherefedinit.
Kështu, as ish kryetari i Qarkut Dibër, Naim Gazidede nuk ishte bashkë me Palokën e Sheferedinin në takimin e organizuar me fëmijët e Peshkopisë, dhe për më tepër që nuk po shihet në fushatë përkrah Shehut duke treguar qartë se dhe ai bojkoton fushatën.
Nuk do mbështesë Shehun as Ilir Krosi, ish kryetari i bashkisë Peshkopi për disa mandate, më i suksesshmi në këtë bashki për PD dhe që mendon akoma deri më tani se të kishte garuar ai vitin e kaluar do të kishte fituar madje thellë.
Dhe për moskandidimin ai akuzon pikërisht Shehun, duke mos qënë dakord me kandidaturën e tij.
Mësohet se kandidatin e PD Shehu nuk do ta mbështesin as eksponentë të tjerë të PD-së Dibër, duke mos qënë dakort me kandidaturën e imponuar nga qendra, pa i pyetur fare strukturat e PD.
Në këtë mënyrë kandidati i PD Sherefedin Shehu pritet ta përballojë vetë fushatën zgjedhore, pa mbështetjen e bazës dhe figurave të bazës, ndërsa aleatët janë tepër të dobët./Tema/a.m.