Briken Calja në një intervistë për Report Tv ka treguar emocionet nga parakalimi në hapjen e Lojërave Olimpike, debatet me Presidentin e KOKSH për bursën olimpike, por edhe mungesën e sportistes së gjashtë shqiptare në Brazil, Evangjeli Leli, e cila nuk parakaloi, pasi mësohet se nuk kishte uniformë.
“Kemi shumë emocione, adrenalina shumë e fuqishme, jo vetëm për ne por për cilindo njeri, pasi Lojërat Olimpike nuk janë dosido” tha ai.
Peshëngritësi shprehet se medalja do të jetë e vështirë që të merret, ndërsa sipas tij shteti do gjithmonë medalje, por nuk e kthen kokën nga sporti.
“Unë jam stërvitur me intensitet të lartë prej 1 viti e gjysmë, jam rikthyer vetëm për Lojërat Olimpike dhe do të jap maksimumin në garë. Cdo gjë ka shkuar mirë deri tani, por është gara që do të japë rezultatin.
Do të bëj maksimumin, përsa i përket medaljeve është pak e ekzagjeruar, por unë do të bëj më të mirën time. Shteti do gjithmonë medalje, por nuk e kthen kokën nga sporti” deklaroi ai.
Përsa i përket debatit ditët e fundit me Presidentin e KOKSH për bursën olimpike, shtangisti e mohon sërish duke akuzuar Bezhanin se gënjen, pasi ai nuk ka përfituar asgjë dhe nëse vërtetohet e kundërta jep dorëheqjen dhe largohet.
“Deklarata e Bezhanit nuk është e vërtetë. Unë nuk mund të gënjej, unë nuk kam kërkuar bursë, kam qenë dëmtuar dhe këtu nuk jam me ftesë, por me kualifikim individual.
Jam një nga 6 mijë sportistë që pretendojnë. Unë nuk kam kërkuar bursë olimpike, pasi nuk më takonte. Nëse kam marrë edhe një lek unë jap dorëheqjen që sot. Jam shumë i qetë”.
Përpos debateve të fundit, ekipi kombëtar në Brazil është përfshirë në një skandal, pasi pavarësisht faktit që e dinte që në Lojërat Olimpike do të ishte edhe një tjetër sportiste, Evangjeli Leli nuk kishte marrë masat për kostumin e saj për momentin e parakalimit.
Mungesën e Evangjeli Lelit e konfirmon edhe Calja, që shprehet se nuk dua që të përzihem,por të gjithë e panë që ajo nuk ishte në parakalim.
