Ministri i Infrastrukturës dhe Energjisë Damian Gjiknuri ka përshëndetur vendimin e Arbitrazhit ndërkombëtar në çështjen e biznesmentit Francesco Becchetti kundër Shqipërisë për ndërtimin e HEC-it të Kalivaçit, që i dha të drejtë shtetit shqiptar.
Gjiknuri e cilëson një lajm shumë të mirë dhe thotë se ky vendim konfirmon vërtetësinë e deklaratave të qeverisë për koncesionin e këtij HEC-i. Tashmë sipas ministrit, kjo vepër energjetike do të ndërtohet nga një investitor serioz.
“Një lajm shumë i mirë. Të dashur miq! Shqipëria fitoi një përballje të rëndësishme në Arbitrazhin Ndërkombëtar të IÇ kundrejt shoqërisë Hydro S.R.L. Gjej rastin të shpreh një falënderim të veçantë për ekipin që përfaqësoi Shqipërinë në arbitrazh: juristët e Ministrisë së Infrastrukturës dhe Energjisë për punën e bërë dhe Avokaturën e Shtetit, e cila me profesionalizëm udhëhoqi me sukses këtë proces. Vendimi i arbitrazhit konfirmoi edhe njëherë vërtetësinë e asaj çka ne kemi deklaruar që në fillim për koncesionin e hidrocentralit të Kalivaçit. Kjo vepër e rëndësishme energjetike tashmë do të mund të konkretizohet nga një investitor serioz”, shkruan Gjiknuri./a.ç
