Qeveria ka miratuar procedurat për legalizimin e shtesave anësore dhe në lartësi, të ndërtuara pa leje. Kriteret dhe procedurat për legalizimin e tyre, në rastet kur ndërtimi kryesor është tjetërsuar, apo nuk rezulton të jetë në pronësi të aplikuesit për legalizim, do të kryhen në emër të pronarit të ndërtimit kryesor. Vendimi i qeverisë përcakton edhe afatet e reja për dhënien e lejes, i cili përgjysmohet në kohë, duke e kaluar miratimin brenda 30 ditëve nga data e vendimit të kualifikimit. Po, ashtu formulari i ri për lejet do të shoqërohet nga planvendosja, në të cilin do të përcaktohen lloji dhe funksioni i objektit, përfituesi i lejes, vendndodhja e objektit, si dhe pronësia mbi truallin.
Vendimi
Leja e legalizimit miratohet për ndërtimin informal, që është kualifikuar për legalizim, në përputhje me përcaktimet e vendimit nr. 280, datë 1.4.2015, të Këshillit të Ministrave, “Për përcaktimin e kritereve, procedurave e dokumentacionit të zbatueshëm për të kualifikuar ndërtimet pa leje….”. Ky i fundit iu referohet ndërtimeve pa leje të cilat kanë minimalisht, të ndërtuar një kat, mbi ose nën tokë; janë të ndërtuara me materiale të qëndrueshme, të ngritura, të paktën, në strukturë dhe janë të lidhura pazgjidhshmërisht me tokën. Drejtoria e varësisë së ALUIZNI-t miraton lejen e legalizimit brenda 30 ditëve nga momenti i kualifikimit të ndërtimit informal. Leja e legalizimit miratohet për subjektin përfitues, që është sipas rastit aplikuesi për legalizim ose personi, të cilit i janë njohur të drejta mbi ndërtimin pa leje nëpërmjet: a) veprimeve juridiko-civile (kontratë për kalimin e së drejtës për të legalizuar ndërtimin), trashëgimisë ose me anë të deklaratës së aplikuesit për njohjen e të drejtave mbi ndërtimin dhe b) vendimit gjyqësor të formës së prerë. Dokumentacioni sipas veprimeve juridiko-civile dorëzohet nga subjektet përpara përfundimit të procedurave administrative të miratimit të lejes së legalizimit. Për shtesat informale, kur ndërtimi kryesor (ndërtimi me leje) është tjetërsuar apo nuk është në pronësi të aplikuesit për legalizim, për miratimin e lejes së legalizimit zbatohen përcaktimet e pikës 11, të vendimit nr. 280, datë 1.4.2015 për vendndodhjen e objekteve, nëse ato ndodhen brenda apo jashtë zonave informale të miratuara. Vendimi i ri shpall se brenda 10 ditëve nga data e miratimit, leja e legalizimit, e shoqëruar nga dokumentacioni teknik, i dorëzohet ose i dërgohet në rrugë postare subjektit përfitues. Për ndërtimet informale, që i nënshtrohen procedurës së kalimit të së drejtës së pronësisë, leja e legalizimit miratohet përpara kryerjes së këtyre procedurave dhe i dorëzohet subjektit përfitues, së bashku me dokumentacionin shoqërues.
Pezullimet
Pezullimi i procedurave administrative dhe i miratimit të lejes së legalizimit bëhet vetëm në rastet kur: a) për ndërtimet informale dhe shtesat anësore a në lartësi plotësohen kushtet e nenit 26, të ligjit nr. 9482, datë 3.4.2006, “Për legalizimin….”, i cili përcakton rastet e mosmarrëveshjeve, të cilat i zgjidh gjykata. b) Për shtesat anësore a në lartësi plotësohen kushtet e nenit 40, kur nga gjykata është vendosur masë sigurimi padie, në kuadër të shqyrtimit të mosmarrëveshjeve midis subjekteve aplikuese dhe pronarit të truallit privat ose kufitar.
Formulari
Subjektet që preken nga ky vendim kanë të drejtë të paraqesin ankim administrativ për lejen e legalizimit, apo kur drejtoria e ALUIZNI-t nuk e miraton atë brenda afatit të përcaktuar në këtë vendim, në Drejtorinë e Përgjithshme të ALUIZNI-t. Për rastet kur punonjësit e niveleve drejtuese në drejtorinë e varësisë së ALUIZNI-t gjenden në kushtet e konfliktit të interesit, leja e legalizimit miratohet nga Drejtoria e Përgjithshme e ALUIZNI-t Formulari i lejes së legalizimit shoqërohet nga planvendosja (genplani) e nga planimetria dhe aty përcaktohen: a) lloji dhe funksioni i objektit që legalizohet; b) subjekti përfitues i lejes së legalizimit; c) gjendja ndërtimore dhe vendndodhja e objektit; ç) pronësia mbi truallin etj. Paraqitja skematike dhe mënyra e plotësimit të lejes së legalizimit miratohen me urdhër të drejtorit të Përgjithshëm të ALUIZNI-t.
SHEKULLI
