Deputeti socialist Erion Braçe, koalicionin e ri Berisha-Meta e quajti me ironi “Shtëpia e Ilirit” duke thumbuar kështu emrin “Shtëpia e Lirisë” të koalicionit të dyshes për zgjedhjet e “6 Marsit”.
Në studion e Zona Zero në Top Neës, Braçe preferoi të mos komentonte procesin në Gjykatën Kushtetuese, por tha se me fushatën zgjedhore që Meta bën si President, duhet të ishte shkarkuar brenda 5 minutave.
“Loja” e Gjykatës Kushtetuese me Metën
“Kemi një Gjykatë të re Kushtetuese, gjykata e vjetër u shkarkua dhe disa dhanë dhe dorëheqjen për mos t’u përballur me Vetting-un. Nuk më shkon të komentoj vendimet e Gjykatës, sidomos kur është në proces. Askujt nuk i lejohet të komentojë apo të shantazhojë vendimet e Gjykatës Kushtetuese. Procesi do shkojë deri në fund dhe do ketë një vendimmarrje të gjykatësve.
Dhe për sa kohë bëhet kjo, politikanët duhet ta qepin. Nëse Meta del në konferencë dhe sulmon haptazi Gjykatën Kushtetuese, kjo është përgjegjësi e tij, por dhe e shoqërisë që duhet të mbrojë institucione, dhe jo një politikan pavarësisht pozicionit që ka. Politikanët duhet të binden që janë të gjithë të barabartë përpara ligjit. Nuk duhet të mendojnë që janë të paprekshëm, të pahetueshëm”
Do jetë Ilir Meta President më 6 Mars?
“Ai s’ka lidhje me zgjedhjet. Për hatër të një procesi të Gjykatës Kushtetuese, po rezervohem, se pas dëshmisë së Berishës se ka diskutuar koalicionin me Metën dhe formuan Shtëpinë e Lirisë, ose Shtëpinë e Ilirit, gjyqi në Gjykatë duhet të kishte qenë vetëm 5 minuta. Por Gjykata po mbledh çdo provë të mundshme në përputhje me Kushtetutën. Një President që përfshihet në fushata zgjedhore, ka thyer Kushtetutën në mes”.
Zgjedhjet e “6 Marsit”
“Mos i japim peshën që nuk e meritojnë këto zgjedhje, janë 6 bashki, me një mandat fare të përkohshëm, 10-11 muaj se pastaj kemi zgjedhje të tjera. Mos t’i mbingarkojmë me politikë, ta përdorin këtë fushatë zgjedhore për zgjidhje të thjeshta. T’i japim kohë vetes që të prezantojmë ide më të qenësishme”.
Do angazhoheni në këtë fushatë?
“Ju ka thënë njeri ndryshe? Unë kam një pjesë të zonës elektorale në Lushnje, që e mbuloj prej 5 vitesh. Kam punuar atje. Është punuar fort nga qeveria, nga bashkia. Jemi të gatshëm të dalim para njerëzve dhe të marrim atë që na takon. Kemi një standart të ri të vendosur, që kush gabon penalisht përballet me drejtësinë, pavarësisht pozicionit. Kemi bërë gabime para njerëzve dhe kemi kurajën të kërkojmë ndjesë.
Por të vëmë në peshore, punën që është bërë gjatë gjithë kësaj kohe, balanca e peshores anon nga puna. Njerëzit të gjykojnë edhe për gabimet tona, po midis njerëzve që s’bëjnë asgjë dhe të tjerëve që punojnë, reformojnë e ndërtojnë vepra por bëjnë dhe disa gabime, atëherë peshorja anon nga ne”./m.j
