Shtëpia 1-katëshe e një gomisti, ‘prova’ që çoi Veliajn në burg! Pronari: Fushën e kisha klient…

Një nga firmat e kryebashkiakut Erion Veliaj për një leje ndërtimi për të cilën akuzohet për korrupsion pasiv dhe ndodhet në burg, është për një shtëpi modeste 1 katëshe në Yrshek, në pronësi të një gomisti. Firma që do ta ndërtonte është kompania “Fusha shpk”, për të cilën SPAK i ka vënë masë sigurie detyrim paraqitje biznesmenit Shkëlqim Fusha dhe i ka ngritur akuzën e korrupsionit aktiv.

Report Tv arriti të gjejë këtë banesë. Pronarin e saj, Glentjan Karaj, banor prej vitesh në këtë zonë, e gjejmë në shtëpi ku sapo është shkëputur nga puna në gomisteri sa për të konsumuar drekën. Ka turp të shfaqet me figurë në kamera në këtë histori të cilën ia treguan fqinjët kur rastësisht e panë në televizor.

Habitet që banesa vetëm 90 m² të cilën e ndërtoi me investimet e jetës, me borxhe tek të afërmit dhe kredi ende të pashlyera, është pjesë e hetimeve të SPAK për kryebashkiakun Veliaj të cilin thotë se nuk e ka takuar kurrë.

“Erion Veliajn nuk e kam takuar për asnjë gjë. Me Çimin (Shkëlqim Fushën) jam njohur prej punës, e ke parasysh ka ardhur nja 2-3 herë për të ndërruar gomat, për asnjë gjë tjetër, as aplikim, as asgjë nuk është marrë. Nuk ka ndërhyrë për asnjë gjë më të vogël”, shprehet pronari, Glentjan Karaj.

Në bisedën me Report Tv, Glentjan Karaj tregon se biznesmenin Shkëlqim Fusha e njeh personalisht pasi disa herë ka ndërruar gomat e makinës së tij në gomisterinë ku punon prej rreth 13 vitesh.  Kur bëri lekët mes shumë sakrificash, thotë se i foli për dëshirën për të ndërtuar shtëpinë e tij në tokën e tij.

“Thjesht kam bërë aplikimin si gjithë të tjerët, nuk është bërë asnjë ndërhyrje, asnjë gjë, asnjë lekë. Arkitektët kanë bërë projektet, i ke të gjitha me letra në bashki, çdo gjë, flasin vetë. Nuk kam as mundësinë, ja shikojeni vetë. Unë erdha për bukë në shtëpi, do të shkoj në punë prapë. Nuk ka lidhje fare Fusha me këtë punë. Nuk ka ndërhyrë për asnjë gjë, për asnjë aplikim, asnjë gjë. Jemi habitur për zotin, për këtë ditë.”, thotë pronari i banesës.

Të habitur nga kjo histori, se si shtëpia e tyre, e dy njerëzve të thjeshtë e punëtore, është pjesë e një dosje korruptive që ka çuar në burg kryebashkiakun Veliaj, ka vënë në hetim bashkëshorten e tij dhe 6 biznesmenë të tjerë, halli i tyre i vërtetë thonë se është ekonomia e familjes dhe kushtet e vështira, me një kryefamiljar thuajse gjithë ditën në punë, e me bashkëshorten shtëpiake.

 “Ne nuk kemi bukë për të ngrënë, sa jam martuar rri në shtëpi pa punë. Muhabeti ynë ky është”, shprehet zonja e shtëpisë.

“90 metra katrorë shtëpi, edhe atë e kemi bërë me djersë me sakrifica”, thotë kryefamiljari.

“Unë nuk i kam larë lekët asaj (shtëpisë)”,- shton gruaja.

Leja për këtë shtëpi në Yrshek, në periferi të Tiranës, është marrë në vitin 2020, ndërsa banesa është përfunduar në 2022-shin.  Siç pronari dëshmon, ka paguar vetëm tarifat ligjore, por pikërisht për këtë leje të marrë, firma Fusha që ka aplikuar si kompani ndërtuese për llogari të gomistit, po hetohet se ka korruptuar Veliajn.